i stokkhólmi

Nýtt blogg!

2005-09-27T15:49:00.000+02:00

Hef ákveðið að prófa að blogga á nýjum stað, HÉR og setja m.a. upp nýtt myndaalbúm þar sem það er 100x aðgengilegra og auðveldara á allan hátt!

Tékkið á því:)

www.123.is/marinus

Adjö adjö!

Þórunn

löngu búin að pakka mar!!!

2005-07-29T17:03:00.000+02:00

Góðan daginn allan daginn:)

Ég er sum sé ekki búin að vera dugleg að blogga hér og sennilega allir lööngu hættir að kígga hér inn.

Er annars búin að vera að vinna á fullu síðan ég kom heim 7.júní, tók mér þó frí um síðustu helgi þar sem Pia, finnsk vinkona mína sem var með mér í skólanum úti og kærasti hennar, Mikke, komu og heimsóttu mig. Ég og Nonni sóttum þau á Keflavík og rúntuðum með þau um landið: Bláa Lónið, Þingvelli, Gullfoss-Geysi, yfir Kjöl, Mývatnssveit, Dettifoss, hvalaskoðun Húsavík... nóg að gera! En þau fengu þetta þvílíkt góða veður alla dagana... annað eins ekki sést á Íslandi fyrr held ég bara. Við Nonni ætlum svo að reyna að heimsækja þau til Finnlands í vor:)

Annars er það bara vinna fram undan, háönnin á fullu og sennilega ekki slakað mikið á fyrr en 1. sept. erum búin að bóka flug til Köben þá!! Vííííí:)

Ég er búin að taka slatta af myndum í sumar og ætla að reyna að koma þeim inná netið (albúm 2) sem fyrst.

Eigið góðar stundir.

Þórinsky

Heim á morgun!

2005-06-05T13:19:00.000+02:00

Þá er dagurinn runninn upp: PÖKKUNARDAGURINN MIKLI! ;)
Búin að hugsa dáltið mikið um þennan dag, velta því fyrir mér hvernig í ösköpunum mér eigi að takast að koma öllu draslinu mínu niður í töskurnar, komast með allt út á flugvöll og sleppa við það að borga fúlgur í yfirvigt! Þetta er því spennandi lokasprettur framundan! Ég er með eina ROSA stóra tösku sem er endalaust hægt að troða í en það má víst bara hafa 20kg og ég er nú þegar komin yfir það og taskan ekki full ennþá!!! Hvernig er þetta hægt?

Í gær var ég soltið sniðug... fannst mér amk! Ég fékk kassa hjá póstinum og tróð í hann öllum bókum og tveimur pörum af þungum skóm og samtals urðu þetta 10 kíló (sem var hámarkið að senda í þessum kassa). Svo fannst mér eitthvað svo ómöguleg tilhugsun að bögglast með 10kg kassa niðrí bæ, hélt að hendurnar myndu líklega detta af mér svo ég þurfti að hugsa eitthvað sniðugt upp til að koma kassanum alla leið án þess að ég yrði handlama. Það hefði verið sniðugt að hafa svona pokakerru eins og allir sænskir eldriborgarar eiga og nota gjarnar þegar þeir fara að versla og staðinn fyrir að halda á plaspokum heim draga þeir góssið í pokakerrunni sinni sem gjarnan er röndótt og vægast sagt hallærisleg!! En ég átti enga röndótta kerru og því góð ráð dýr! Þá kom ég auga á hjólabretti sem litli strákurinn á hér heima:) Málið leyst! fékk mér spotta og batt í brettið og dró svo gula kassann frá póstinum á brettinu niðrí bæ og niðrá pósthús! hehe.. sjáið þið þetta ekki fyrir ykkur: flestir eru með svona smáhunda í bandi en Þórunn kom röltandi með gulan pappakassa á hjólabretti!! :o) En þetta svínvirkaði og ég get alveg mælt með þessu.

Jæja lömbin mín, ætla að halda áfram að pakka og leggja á ráðin!

Have a good one!

Thorinsky

2005-06-05T11:00:00.000+02:00

Ég og tvær af þeim finnsku, Pia og Marja. Tekið sl. fimmtudag. Kíktum nokkur í bekknum út og fórum m.a. í KungsträdgÅrden Þar sem stendur nú yfir árlegt festival "Smaka på Stockholm" þar sem veitingastaðir í bænum eru með kynningu og fólk getur fengið að eta og drekka fyrir sanngjarnt verð!

Lite om Norgesbesök

2005-06-01T20:08:00.000+02:00

Jæja þá...
Ég kom heim frá Norge í fyrradag (mánudaginn) eftir vel heppnaða ferð:) Fyrstu tvær næturnar var ég hjá Sigþrúði (systur pabba) og co. á Klöfta. Við Hildur kíktum smá í bæinn á föstudagskvöld en vorum báðar eitthvað þreyttar svo við fórum snemma heim (það er svona þegar árin verða fleiri verður úthaldið minna!!). Tókum því svo rólega á laugardaginn en Haukur frændi bauð okkur svo í mat, fengum dýrindisfiskrétt! :) Á sunnudaginn fórum við Hildur í heimsókn til Abba (bróður mömmu) á Granveien og eftir það smá í bæinn. Tókum svo kettina hennar Hildar á Klöfta og keyrðum til Fredrikstad. Hildur sýndi mér skólann hennar og við hljóluðum aðeins um í gamla bænum sem er ótrúlega fallegur, minnir að sumu leiti á Gamla Stan hér í Stokkhólmi en hann minnti mig líka á Kalmar í S-Sverige, þar sem ég var fyrir þremur árum. Hildur galdraði svo fram ljúffenga pizzu í eldhúsinu um kvöldið. Ég fór svo með Hildi í skólann og fylgdist með í smá stund áður en ég keyrði svo til baka til Klöfta. Flaug svo til Stokkhólms seinnipartinn.

En nú er bara eitt próf eftir hjá mér, málfræði á laugardaginn og ég er eitthvað að reyna að kíkja í bækurnar en það er ótrúlega margt annað sem lokkar!! skil það ekki;)

Ég er búin að setja fullt af myndum í albúmið og reyndar svo mikið að það fylltist!! er búin að búa til nýtt albúm og þar eru myndir frá Norge. Nennið þið að gera mér smá greiða, skrifa hér í comment hvort þið getið komist inná albúmin eða ekki?? mér gengur alveg ljómandi að komast inná þau en það er eins og það sé eitthvað mislétt.

Annars er ágætis veður hér í dag, hálf sól og ca 15-17 gráður. Þeir eru nú samt að kvarta yfir kulda og sólarleysi hér undanfarið... ég er nú bara fegin að það er ekkert of heitt hérna núna, þá yrðu viðbrigðin of mikil við að koma heim!!!

Gott í bili,
Adjö adjö

2005-06-01T20:02:00.000+02:00

fr�nkurnar

Heja Norge!?!

2005-05-27T13:56:00.000+02:00

Jæja þá ætla ég að leggja land undir fót og skreppa yfir landamærin til Noregs! Ætla að heimsækja Hildi frænku og einhvern slatta af öðru frændfólki:)

Annars var ég í prófi nr. 2 í morgun (skriftlig färdighet/läsfärdighet) og gekk það bara alveg áfallalaust fyrir sig. Svo er eitt próf um miðja næstu viku og síðasta á laugardaginn eftir rúma viku. Flýg svo heim mán. 6. júní (þjóðhátíðardagur Svía!). Það verður nú hoppsumhí og trallalæ en nú er þjóðhátíðardagurinn í fyrsta skiptið "rauður dagur" og því líklegt að menn arki um allar götur með blöðrur og fána... "hæ hó jibbíjeij og jibbííiijeij, það er kominn sjö-ötti júní" ...passar ekki alveg eins vel, enda held ég að svenskarnir kunni ekkert þennan söng! ;o) Þarf endilega að komast að því hvort þeir hafa svona lög eins og Öxar við ána o.þ.h.

Hér er búið að vera fínasta veður undanvarna daga, kringum 15-22° og ýmist sól, skýjað eða smá rigning... voða gott fyrir gróðurinn erþakki?! ;) og ég farin að kvíða því að koma heim í frostið og fönnina... Það væri nú helv... gaman ef hægt væri að kippa þessu í liðinn áður en ég kem heim! Hver býður sig fram?

Jæja góðir hálsar, ætla að fara að skoppa út á flugvöll og sjá hvort þeir vilja ekki fljúga með mig til Osló!

Trevlig helg allihopa! <;o)

Sniðugt í Stokkhólmi! ;)

2005-05-23T23:34:00.000+02:00

Svíum finnst mjög gaman að standa í röð! Amk mætti oft halda það því það fyrsta sem svíi gerir þegar hann kemur inn í banka eða á póshús er að svipast um eftir númeramaskínunni svo hann geti nú fundið sér blett til að standa á. Og honum finnst ekkert athugavert við það að þurfa að standa í röð til að fá raðnúmer til að komast að í aðalröðinni!

Í matvöruversluninni fá náttúrulega allir að standa í röð líka til að komast að kassanum, voða fjör. Ekkert ólíkt því sem gerist í Kaskó. Í Kaskó eða Bónus er það þó oftast þannig að maður er að flýta sér ofsa mikið og sturtar því öllu gummsinu úr körfunni á beltið og kassadamann/herrann alveg svitnar alveg við að rúlla því sem hraðast í gegn. Þannig er það alls ekki í Stokkhólmi. Þar er gjarnan miði við endann á færibandinu þar sem ég er vinsamlegast beðin um að raða vörunum mínum á færibandið í einfaldri röð og snúa strikamerkinu að mér! Væntanlega ætlað til þess að kassadaman/herrann geti þrusað þessu létt í gegn en samt er eins og þau séu ekkert að skilja það og taka sér alltaf svo ótrúlega góðan tíma í að handleika hverja vöru og nota gjarnan báðar hendurnar til að færa smjörið í gegnum geislann. Kannski þau séu að spá í hvort ég hafi nú valið rétt smjör, hvort nákvæmlega þessi tegund hæfi mér því hér eru sko til margar tegundir af smjöri, maður lifandi!! Ein skemmtileg saga þar sem smjör kemur við sögu. Ég var stödd í matvöruverslun niðrí bæ um daginn og var að reyna að velja mér hrökkbrauð sem er hrikalega erfitt því það eru jafnvel fleiri tegundir til af því en smjörinu. Þá víkja sér að mér amerísk hjón og spyrja mig hvort ég viti hvar smjörið sé! Ég segist nú halda að það sé bara þarna í kælinum ásamt hinum mjólkurvörunum og þá voru þau búin að vera þar og eyða dágóðum tíma í að pæla í þessu en gátu bara ekki trúað því að það væri heil hylla bara fyrir smjör! Héldu að þetta hlyti að vera eitthvað allt annað!

Röð og regla kemur líka mikið við sögu í ríkinu þeirra (ÁTVR = System Bolaget) nema þar er þetta ennþá nákvæmara því þar eru hvítmálaðir hringir á færibandinu og þú leggur eina flösku eða bauk í hvern hring, og eins gott að strikamerkið snúi að þér! Ég hef átt í basli með að hitta alveg inní hringina hingað til... hvernig ætli aumingja rónarnir fari þá að???

Eitt mega svíarnir þó eiga að það er mun auðveldara að lesa blöðin hér en á Íslandi. Ekki að þau séu eitthvað betur skrifuð heldur eru þau svo snilldarlega heftuð saman og í minna broti. Það er því alveg hægt að lesa blaðið vandræðalaust án þess að vera alltaf að berjast við að halda því saman í einu lagi allan tímann! Sniðugt í Stokkhólmi!

Ís sem frýs!

2005-05-21T16:35:00.000+02:00

Norðurlandabúar eru meðal mestu ísæta í heiminum.

Í fyrsta sæti eru þó Nýsjálendingar sem sporðrenna að meðaltali 25 lítrum á ári á hvern íbúa. Í öðru sæti eru Ameríkanar með rúmlega 20 lítra á man nog Kanadamenn með tæpa 20. Svíjar eru í 6. sæti með nær 15 lítra af ís á ári og rétt á eftir kom Finnar með örlítið minna en Svíjarnir. Í áttunda sæti eru Danir með tæpa 10 lítra á ári (Heimir ekki talinn með!). Á eftir þeim koma Ítalir og Þjóðverjar og Frakkar sem eru enn slakari, klára ekki af nema ca. 5 lítra af ís á ári á hvern íbúa.

Íslendingar eru ekki nefndir í þessari upptalningu en ég býst fastlega við því að við séum nálægt heimsmetinu í ísáti eins og svo mörgu öðru! ;)En ég er ekkert hissa á því að Svíjar séu ofarlega á þessum lista því hér eru til ótrúlega margar tegundir af ís: margskonar ís í brauði, ískúlur og síðast en ekki síst ÍSPINNAR! Svíjar bíða nefnilega spenntir á hverju vori eftir ”ísfrumsýningunum” þ.e. hverjar eru ísnýjungarnar þetta árið og má sjá auglýsingar í blöðum, sjónvarpi, á strætóbiðskýlum og í neðanjarðarlestunum um alla nýju ísana. Í blöðunum eru einnig birtir dómar um bestu nýliðana og góða og slæma eiginleika þeirra. Svo er auðvitað alltaf einhverjir ”diet” pinnar kynntir: ”einungis 1% fita” o.s.frv.

En það eru ekki allir jafn hamingjusamir með alla þessa fínu íspinna! Þær Elisabeth Kaleebi og Kristina Larsson hjá Jafnréttisstofunni í Malmö halda því fram að a.m.k. tveir af íspinnum GB-Glace (sem er leiðandi ísframleiðandi í Svíþjóð) séu með tilvísanir sem séu með öllu óviðunandi. Ísarnir sem um ræðir heita ”88” og ”Nogger Black”. Nogger Black segja þær að vísi til kynþáttahaturs og 88 til nasisma. Jakkar nasista hafi verið merktir með tölunni 88. Einnig sé bókstafurinn H númer 8 í stafrófinu og muni því 88 vera dulmál fyrir Heil Hitler. Forsvarsmenn GB-Glace hafa ekki í hyggju að breyta nöfnunum á ísunum og vísa þessum ásökunum á bug. Talsmaður fyrirtækisins bendir á að annar ís GB, ”Igloo Cola” hafi einnig orðið fyrir aðför þar sem því sé haldið fram að hann ýi að kókaínneyslu eskimóa.
Dæmi svo bara hver fyrir sig!

Þær Elisabeth og Kristina eru lítt hrifnar af 88 og Nogger Black!

Stokkhólmur-Grisslehamn-Eckerö-Mariehamn

2005-05-17T01:09:00.000+02:00

Hej allihopa!

Skrapp til Álandseyja á föstudaginn, dagsferð frá Stokkhólmi sem var þannig að fyrst var það tæplega 2 tíma rútufbílaerð til Grisslehamn þaðan sem ferjan fer yfir til Eckerö á Álandseyjum. Þaðan var svo aftur nærri klukkutími í rútu til Mariehamn sem er aðal pleisið, 10.600 íbúar. Mjög vinalegur bær og minnti mórallinn nú bara á eitthvað íslenska sjávarþorpið, reyndar aðeins stærra. En þarna þekktist fólk útá götu og tveir bílar með háværri músíkk og drengjum með öl í hendi hringsóluðu um Garðarsbrautina. En Álandseyjar samanstanda af um 6.500 eyjum en í dag eru 65 byggðar og búa þar alls 26.200 manns. Á stærstu eyjunni er sem sagt Mariehamn og bærinn sá á tvær hafnir, austari og vestari. Ég byrjaði á því að skoppa þeirra á milli, í austari eiga m.a. heima tvær skonnortur, Linden og Albanus en aðeins Albanus var heima. Í þeirri vestari á liggur hins vegar Pommern sem er 4 mastra fraktskúta byggð 1903 og er eina fraktskútan frá þessum tíma sem er varðveitt í uppranalegri mynd í heiminum! Skoðaði hana sem snöggvast en þetta er ótrúlega flott skip með magnaða sögu! Svo rölti ég um í miðbænum og það var bara góður stemmari á eyjaskeggjum. Seinnipartinn hoppaði ég svo aftur uppí bussinn og rúllaði til Eckerö, tók ferjuna til baka og svo aftur 2 tíma í annarri rútu! Sum sé komin með alveg ársskammtinn af rútubílum því þetta er alls ekki minn uppálhaldsferðamáti!
Það var hins vegar kapítuli út af fyrir sig að fara með ferjunni. Þar sem Álandseyjar eru ekki í Evrópusambandinu er fríhöfn um borð og hvað haldið þið að svíjalingarnir stundi? Nema hvað að kaupa sér far með ferjunni fram og til baka (kostar nú bara innan við 400 kall ísl.), versla öl í fríhöfninni, fara frá borði en svo strax aftur um borð og heim aftur. Drekka svo helst soltið mikið um borð og rúlla svo á eftir sér bjórkassakerrunum sem hægt er að kaupa í fríhöfninni heim glaðir í bragði með feng dagsins!;)
Ég keypti nú enga kassa af bjór, fékk mér reyndar einn með kjötbollunum sem ég snæddi á leiðinni heim:)

En þá er ekki fleira í þættinum í kvöld... veriði sæl.

ps. setti inn nýjar myndir í albúmið, veit reyndar ekki hvernig fólki gengur almennt að komast inná það... þið kannski látið mig vita;)

Botten upp!

problematiskt

2005-05-11T18:37:00.000+02:00

Jæja, það gengur víst eitthvað illa með þetta blessaða myndaalbúm. En ég setti nokkrar myndir hér á bloggið í staðinn, vona samt að albúmið fari nú að hressast!;)

ps. það hefur samt stundum virkað hjá mér að leyfa explorer að tyggja á glugganum, þ.e.a.s. ef eitthvað er að gerast og ekki kemur bara "The page cannot be displayed", og þá stundum kemur þetta upp eftir 5-10 mín! sem er náttúrulega óþolandi, en samt ;)

Ha en fortsätt trevlig dag! ;o)
Þórunn

2005-05-11T18:34:00.000+02:00

Heimir og Guðrún komu í heimsókn helgina 30.apr til 1.maí. Borðuðum Sushi fyrsta kvöldið, voða gott og þess má geta að nú er ég gjörsamlega húkkt á Sushi!!!

2005-05-11T18:32:00.000+02:00

Kungsträdgården

2005-05-11T18:31:00.000+02:00

Í Kungsträdgården. Kirsuberjatrén nýblómstruð og fín:)

2005-05-11T18:30:00.000+02:00

Fengum okkur ístalskan ís... Heimir var alsæll með þann morgunverð;)

2005-05-11T18:29:00.000+02:00

Gellurnar að brjóta saman teppin eftir matinn:)

2005-05-11T18:27:00.000+02:00

Fórum á tónleika með Queen + Paul Rodgers í Globen! rosa stuð;) hér eru kallarnir að tónleikum loknum!

2005-05-11T18:26:00.000+02:00

Fengum okkur Bröns á Djurgårdsbron café. Strandvägen í baksýn.

2005-05-11T18:25:00.000+02:00

Gott gengi!! Árni, pabbi og Sóley komu til Stokkhólms til að vinna að Garðarshólmaverkefninu. Hér eru þau + Heimir og Guðrún á labbinu í Kungsträdgården

2005-05-11T18:23:00.000+02:00

Fyrir utan Sjöhistoriska museet. Árni og Sóley að labba upp tröppurnar;)

Sænska, já takk!

2005-05-10T23:47:00.000+02:00

Af hverju lærum við dönsku? Svarið er líklega það að Ísland var eitt sitt dönsk nýlenda en einnig að mikilvægt sé fyrir fámenna og einangraða þjóð að halda tengslum við grannþjóðirnar. Flest eða öll höfum við lært dönsku í skóla en fæst getum við talað hana eða skilið talað mál. Danskan er einfaldlega frekar erfitt tungumál, framburðurinn strembinn og til að danskurinn skilji útlending tala dönsku þarf viðkomandi helst að vera stöðugt með heita kartöflu í hálsinum. Það getur verið erfiðleikum háð af augljósum ástæðum.

Væri ekki svolítið skemmtilegra ef Íslendingar fengju að læra tungumál sem væri ögn auðveldara að bera fram, þar sem maður þyrfti ekki að kúgast hvað eftir annað til að gera sig skiljanlegan? Jú! Og sænska er svarið “mina vänner”! Þar eru allir svo syngjandi glaðir og kátir þegar þeir tala og engar kartöflur notaðar, nema bara til að bera fram með kjötbollunum og týtuberjaberjasultunni.

Af reynslunni hef ég lært að sænska er auðlærðari en danska, fleiri Norðurlandabúar skilja sænsku en dönsku og einnig eru mörg orð eins eða a.m.k. mjög lík á sænsku og íslensku. Sænska og íslenska voru jú eitt sinn sama tungumálið sem og hin Norðurlandamálin en svo þróuðust þau sitt í hvora áttina. En það er einnig skondið að nokkur orð í sænskunni hafa þróast pínulítið í öfuga átt frá upphaflegri merkingu í gamla daga og er ekki laust við að maður brosi í kampinn þegar þau verða á vegi manns. Kíkjum á nokkur dæmi.

Kasse = plastpoki

Rolig = skemmtilegur

Strax = rétt bráðum

Samt = og

Dimma = þoka

Kissa = pissa

Kjol = pils

Burt séð frá nokkrum misþroska orðum í sænskunni, sem í fyrstu geta valdið ruglingi, í það minnsta kallað fram bros, er sænskan að öllu leyti betri en danska. Þess vegna finnst mér að Íslendingar ættu að stíga sjálfstæðisskrefið til fulls frá undiroki dana og skipta dönskunni út fyrir sænsku og því segi ég: Sænska, já takk!

Nýjar myndir í Albúmið!

2005-05-06T10:56:00.000+02:00

Jæja, var að setja inn myndir frá síðustu helgi en það var mikið um að vera þá, Heimir og Guðrún komu brunandi frá Kolding og gistu hjá mér í fína fína Ikea svefnsófanum;) og pabbi, Árni og Sóley komu á sunnudeginum til að vinna að Garðarshólmaverkefninu, skoðuðum söfn og fórum á fundi.
Ég segi ykkur meira frá helginni síðar, en myndirnar tala nú sínu máli!
Hins vegar hefur verið eitthvað bras á þessu myyndaalbúmi, held að það sé vegna álags svo ef þið komist ekki inn í fyrstu tilraun... er bara að reyna aftur síðar;)
Adjö!

Fólk á faraldsfæti

2005-04-29T18:12:00.000+02:00

jæja já... Nu är det jul igen!

Sól og 15°... ég kvarta ekkert, gæti alveg vanist því að hafa svona almennilegt vorveður þar sem maður finnur lyktina af blómunum og trjánum sem eru að springa út og laufgast á fullu!! Greinilegt að vorið er komið. Önnur mekri um vorið eru að allir fara að háma í sig ÍS! Svíjar eru miklar ísætur og ég las einhvers staðar að bara finnar éti meira. Og svíjar borða ekki bara ís úr vél heldur eru þeir svo hrifnir af alls kyns íspinnum og toppum að það mátti hér um daginn lesa í mörgum blöðum dóma um bestu ísana, bestu nýjungina og þar fram eftir götunum;) Annar vorboði er þegar pilsin hjá ungu stúlkunum fara að styttast allverulega!! Fyrr má nú aldeilis fyrr vera!! segi ég nú bara! Ekki efnismiklar flíkur það og sumar líkjast meira breiðum beltum en nokkru örðu. En það má alveg brosa að þessu á meðan stúlkugreyin lenda ekki í einhverju basli því hvaða merki halda þær að þær séu að senda frá sér... spurning!

En við Nonni höfðum það rosa gott um síðustu helgi, það var reyndar ekki neitt rosalega hlýtt og alveg svona týpískt gluggaveður... ég er að reyna að kenna svíjunum þetta hugtak með gluggaveðrið... þeir eru ekkert að fatta það held ég, kannski af því að það er sjaldnar gluggaveður hér en heima á Íslandi. En við létum það ekkert á okkur fá, klæddum okkur eins og það væri 15 stiga hiti og sól eins og sönnum Íslendingum sæmir og vorum svo oftast að drepast úr kulda;) hahaha! neinei kannski ekkert alltaf. En á laugardeginum fórum við í Gröna Lund sem er tívólíið þeirra hér í Stokkhólmi og það var alveg snilld! Nonni hafði eiginlega aldrei áður farið í svona fullorðins tívolí svo við gátum alveg hlegið og grínast eins og á að gera í tívolíi;) Það var þarna eitt tæki sem mér fannst alveg ROSALEGT! Það er svona turn, 100m hár og á honum eru nokkrir stólar þar sem maður er ólaður niður. Svo er maður hífður upp á topp (upp í 80m), stoppar þar í smá stund og þar er sko alveg frábært útsýni yfir borgina en þegar maður er að njóta útsýnisins í botn og á sér einskis ills von þrusar græjan niður á FULLU!!! og ég get sagt ykkur að ég galaði eins og versti hani alla leiðina niður (tók ekki nema 2.5 sek) og maginn varð eftir uppi! Þvílíkt kikk en ég hætti mér ekki aftur í þetta skaðræðistæki!
Svo fórum við m.a. í rússíbana og mér fannst það eiginlega skemmtilegast.. fórum líka 2svar og ég hló eins og ég veit ekki hvað:) Eftir að við vorum búin að þræða tækin eins og við nenntum löbbuðum við hring á lottóbásunum og festumst á einum þar sem átti að rúlla boltum og reyna að hitta í nokkur göt við enda brautarinnar og maður fékk mismörg stig, fleiri eftir því sem gatið var minna. Nú, í verðlaun voru hundabangsar sem mér fundust pínu sætir og ég bað Nonna að vinna einn handa mér... er það ekki annars alltaf þannig? En þetta gekk eitthvað illa hjá okkur, reyndum aftur og aftur en fengum aldrei nógu mörg stig:( svo við héldum áfram röltinu en enduðum svo aftur á sama stað! Gellan sem vann þarna hló bara að okkur þegar við komum aftur en hvað gerði svo Þórunn?? jú hún hitti loksins nokkrum boltum í réttu götin og vann einn sætan hundabangsa og nú er hann hérna hjá mér í herberginu og heitir Nonni!! ;)

Á sunnudaginn skelltum við okkur í smá útsýnissiglingu og seinnipartinn hittum við svo foreldra Nonna sem höfðu verið þessa daga í heimsókn hjá ættingjum í S-Svíþjóð. Við röltum í Gamla bæinn, fengum okkur öl og svo borðuðum við á steikhúsi einu niðrí bæ, alveg fínastu steikur.

Svo þessir dagar voru sko alveg lúxus fínir <;o)

Heimir og Guðrún eru núna einmitt í þessum skrifuðum orðum í umferðarsultu einhvers staðar í Stokkhólmi! Þau ætla að vera hérna yfir helgina, við ætlum m.a. á QUEEN tónleika á lau.kvöldið... eitthvað sem Heimir er búinn að bíða eftir í einhver 20 ár eða svo! Freddie kallinn boðaði forföll svo Paul Rodgers ætlar að syngja fyrir hann. Það verður vonandi gaman að kíkja í Globen, stærstu gorkúlu í heimi!!
Svo koma pabbi, Árni frændi og Sóley (sem er að vinna í Garðarshólmaverkefninu með okkur) á sunnudaginn og við ætlum að kíkja á einhver söfn og funda með einhverju fróðu fólki um Garðarshólma.

Nú, svo má ekki gleyma því að Maren vinkona kemur líka til Stokkhólms í dag með vinkonum sínum og ég ætla að reyna að hitta eitthvað á hana líka... svo það er bara mikið um að vera þessa helgi... fullt af fólki:)

Læt þetta duga í bili og vona að þið hafið það öll rosa gott!

Trevlig helg allihopa!!

Bloggy blogg bloggens...

2005-04-27T23:37:00.000+02:00

...hefur verið latur þessa dagana. En það stendur alveg pottþétt til bóta:)
Það hefur verið rosa gott veður síðustu daga, sól og svona alveg þokkalega hlýtt svo ég hef notað tækifærið og tekið með mér bækurnar eftir skóla og tillt mér einhvers staðar út í haga. Það er alveg fullt af stöðum til að gera það hér í Stokkhólmi, alveg slatti af görðum og svo í öllum þessum hólmum er alltaf einhverjar gróðurspilldur. Fór í dag í Hagaparken sem er hér rétt hjá og er einn af stærstu görðunum hér í Stokkhólmi. Slatti af fólki en ég get alveg ímyndað mér að á sumrin sé þarna alveg hrúga af fólki í picnic.
En Nonni var sum sé hérna hjá mér um síðustu helgi og það var voða gott að fá að hafa hann í nokkra daga. Við höfðum það mjög gott og ég ætla að segja aðeins betur frá því seinna.
EN ég er búin að setja inn nýjar myndir frá "Nonna-dögum"
Kíkið í Myndaalbúmið og kvittið kannski bara í Gestabókina í leiðinni... eller hur?;)
Bið að heilsa í bili.
Hej då ;o)

Sól skín í heiði

2005-04-16T17:05:00.000+02:00

Já það er þetta með Evróvision... Selma náttlega búin að vinna keppnina, eða amk vel byrjuð á því samkvæmt hinum og þessum könnunum! Eins og ég sagði hér um daginn eru Svíjar miklir Evróvision-aðdáendur en ég ætla ekki að veðja á þeirra lag í ár. Gellan, Nanne Grönvall, sem varð í öðru sæti í undankeppninni hér er hins vegar að gera það gott, lagið hennar mjög vinsælt, og vitiði hvað? Ég meirað segja sá hana Nönnu í gær!! Ég skrapp í verslunarmiðstöð hér í úthverfi Stockholms og þar var sú gamla að troða upp! Ég skildi ekkert í því að allt fólkið var farið að stilla sér upp fyrir framan eitthvað svið sem búið var að græja í miðri verslunarmiðstöðinni og hrúga af krökkum sem beið í röð með blað og penna! En þá var það Nanne Grönvall sem kom, sá og sigraði, söng þarna ein 3 lög og dillaði sér. Svo fengu krakkarnir eiginhandaráritun og mynd af sér með stjörnunni. En það er sennilega bara gott fyrir okkur Íslendinga að Nanna lenti bara í 2. sæti í undankeppni þeirra Svía því lagið hennar er í svona svipuðum dúr og lag Selmu. Nanna gæti hafa strítt Selmu pínu en ég hef ekki miklar áhyggjur af leðurjakkatöffaranum sem Svíar senda til Kænugarðs með “Las Vegas” lagið sitt.

Annars eru þeir búnir að finna fleiri líkamsparta í sjónum í miðborg Stokkhólms og búnir að staðfesta að það er af sama manninum. En það vantar víst einhverja nokkra bita uppá enn! Hljóta að koma í leitirnar fyrir rest. Ruggglið!

Hér er rosa fínt veður í dag, nær 15 stiga hiti og sól, fuglarnir syngja og ég held að vorið sé á leiðinni hingað með hraði. Vona að þetta haldist eitthvað áfram því Nonni minn ætlar að koma í heimsókn í næstu viku! Það væri amk ekkert verra að hafa smá vor.

...og þá er ekki fleira í þættinum í kvöld. Veeeriði sæl!

2005-04-10T14:55:00.000+02:00

2005-04-10T14:54:00.000+02:00

hahahahaha

2005-04-10T14:53:00.000+02:00

...að vera eða ekki vera...

Sænska líkfundarmálið!

2005-04-09T15:00:00.000+02:00

Hvað er þetta með líkfundi hér á Norðurlöndunum ? ! ?
Fyrir nokkrum vikum fannst sundurhlutaður danskur leigubílsstjóri í húsasundi í Köben. Þeir náðu nú að bera kennsl á líkið fyrir rest með miklum hamagangi í blöðum m.a. En hér í Stokkhólmi fannst í enda mars sundurhlutað lík í poka, hálft á kafi í ís undir einni brúnni sem liggur við Gamla Stan! Þeir eru alveg í vandræðum að bera kennsl á líkið, þvílíkur vandræðagangur, í fyrstu gáfu þeir út að líkið væri af 50-60 ára gömlum karlmanni en nú fyrir nokkrum dögum uppgötvuðu þeir einhvern vegin að þetta væri víst kona! Sögðust fyrst hafa haldið að þetta væri karlmaður með kvenlega drætti... Greinilegt að það hefur vantað eitthvað upp á mikilvæga líkamshluta... Jösses! En nú hefur verið haft samband við lögregluyfirvöld á hinum Norðurlöndunum til að reyna að bera kennsl á aumingjans konuna. Um 50 vísbendingar um málið hafa borist löggunni og í blaðinu í gær var mynd sem ljósmyndari hafði sent inn þar sem hann var að taka myndir af svönum á vatninu í byrjun mars og á einni myndinni sást hendi sem stakkst upp úr ísnum!! Krípí skrípí! En löggan segir að þetta hafi ekki með málið að gera því myndin var tekin næstum mánuði áður en líkið fannst og líkið fannst nokkur hundruð metra uppstraums frá því þar sem myndin var tekin. En má ég þá spyrja... hver á þessa hendi... hafa þeir engar áhyggjur af því?!?
Úfff þetta er nú meira málið!

En að öðru örlítið skemmtilegra.
Evrovísion þeirra Svía er þeim mikið huðgarefni... þeir eru sko alvöru evróvísion-aðdáendur. Þetta byrjaði nú bara þegar ég kom út því það voru ca 10 undan-undankeppnir haldnar um allt land og í hverri var einn sigurvegari sem tók svo þátt í lokaundankeppninni í Globen hér í Stokkhólmi í byrjun mars. Sá sem vann heitir Martin Stenmark og víst frekar vinsæll hér held ég. En það eru líka hin 10 lögin sem voru lokaundankeppninni því þau eru spiluð sundur og saman í útvarpinu og geisladiskurinn rýkur út!! Lagið sem varð í örðu sæti virðist þó vera vinsælla en það sem vann þvi það var 1. sæti á sænksa vinsældarlistanum í síðustu viku! Og það er sko alveg týpískt eurovisionlag því það festist við litla heilaling alveg tímunum saman: "kom och håll om mig, släpp inte tagit av mig... lalala"
Í blaðinu fyrir nokkru var birtur listi yfir alla Evrovísion þáttakendur og einhver eurovision plebbi reyndi að spá í hvort hvert lag væri ógn við það sænksa. Þar var sagt um hana Selmu okkar að hún væri íslenska útgáfan af Önnu Sahlene sem er poppdíva í Svíþjóð og að lagið væri meinlaust lag sem sveiflast milli þess að vera gítarpopp og disco! Hvað finnst ykkur um það, er Selma litla alveg meinlaus?? Það var nú sænkst beib sem skákaði Selmu 1999... sá hlær best sem síðast hlær segi ég nú bara og spái því að Ísland verði ofar en Svíþjóð í Evrovísion í ár! Og hananú! :)

"Island, 12 points"

Adjö mina vänner

Sól á sunnudegi :#)

2005-04-04T00:35:00.000+02:00

Hejsan peysan!

Hér var bara sól og blíða í dag:) Hitamælir nirí bæ sýndi heilar 18° en ég veit ekki hvort þær voru alveg svo margar... en samt mjög gott veður, ég sprangaði bara um bæinn í dag á stuttermabol með sólgleraugu á nefinu og fékk alveg svona "útlandafíling" sem var alveg gaman ;)
Ég fékk mér göngutúr niðrá Kungsträdgården sem er garður/útisvæði í miðbænum og þar var alveg massa mikið af fólki, flestir að éta ís eða pylsu og sleikja sólina. En svo sá ég að hópur fólks var samankomin í hring og þegar ég kom nær sá ég að þarna voru nokkrir kallar að tefla með svona stóru útitafli. Ég fylgdist aðeins með þeim, bara að tékka á því hvort ég myndi mannganginn og reyna að þekkja þessa spýtukalla í sundur. Gekk nú svona og svona, þekkti alveg þá hvítu frá þeim svörtu sko, og svo voru drottningarnar með kórónu en hinir gaurarnir voru allir mjög svipaðir. En svo heyrði ég að tebblararnir voru að ræða um það hverjir væru næstir að tefla og eitthvað. Svo var þarna einn arabamaður sem spurði mig hvort ég tefldi? Ég kunni nú ekki við annað en að játa því (þó það séu líklega amk 10 ár síðan ég snerti taflborð síðast) og hann voða glaður... "já og viltu þá ekki bara tefla við vin minn hérna sem vantar mótspilara?" ... "hem hemm! ja ég sko held ekki núna!" Hefði náttlega átt að segja honum að landi minn væri nú fyrrv. heimsmeistari í skák og ég vildi ekkert vera að trana mér fram svona á almannafæri! En í staðinn þóttist ég vera mjög bissí og dreif mig í burtu! hahaha... bara gaman:)

Búin að setja inn nokkrar myndir síðan frá páskadögunum heima (undir Myndaalbúm hér til hliðar)

Annars bara allt bra og ég bið að heilsa ykkur í bili;)

Klart slut!
Thorinsky

P.S. Hér er einn fyrir þá sem vilja æfa sig í sænsku

Mamma, hur kom jag till egentligen? frågade 5-åriga Lisa sin mamma.- Jo, sa mamma, du förstår att när pappas spermier befruktar ett ägg i min mage så gror det till ett litet barn.- Ja men hur får du spermierna i magen då? Sväljer du dom?- Nej, sa mamma, inte när jag ska ha barn. Men när jag vill ha en ny dräkt så händer det.

Páskarnir á Íslandi :)

2005-04-02T14:05:00.000+02:00

Jösses! Var ég ekki bara búin að skrifa alveg helling hérna og svo klikkði tengingin þegar ég ætlaði að publisha! Bömmer spömmer! Maður virðist seint læra af mistökunum og ég var auðvitað ekki búin að seiva textann neins staðar!
En þá er bara að byrja aftur.

Ég eyddi sum sé páskunum á klakanum þó það hafi reyndar ekki verið mikið af honum því það var þvílík blíða flesta dagana:) Ég lenti á Keflavík á fim. eftirmiðdag og ætlaði svo að ná flugi strax norður... en það klikkaði smá því kjánasniglarnir á flugrútunni frá Keflavík söfnuðu í rútuna í ca hálftíma sem varð til þess að ég missti af fluginu mínu norður! Missti líka af leikhúsinu á Húsavík sem Nonni var búinn að panta fyrir okkur en pabbi og mamma gátu nýtt sér miðana. Ég beið sum sé 2.5 tíma á hinum bráðhressandi Reykjavíkurflugvelli og komst svo með síðustu vél norður. Nonni og Lilja þá búinn að bíða nokkuð marga klukkutíma á Akureyri eftir mér! Við brunuðum svo á Húsavík og svo fljótlega uppí Mývó. Gistum þar því það stóð mikið til á föstudaginn, nebblega hin víðfræga píslaganga:) Nonni og tveir félagar hans frá Húsavík örkuðu hringinn á mettíma en ég lét mér nægja að rúnta um og hjálpa mömmu í fiskisúpunni. Eftir göngu og baðlón mættu svo garpar og görpur í súpu en það er hefð fyrir því að vinir og vandamenn mæti í súpuna eftir gönguna. Um kvöldið renndum við Nonni svo niðrá Húsavík, kíktum í partý (ásamt Kolding genginu: Heimi, Guðrúnu og Agga) til Kristrúnar og 2 vina hennar frá UK í Kaldbakskot og svo smá á Baukinn. Ég var alveg búin að gleyma hvernig timburmenn líta út en þeir heimsóttu mig svo daginn eftir, alveg óboðnir... hnuss!

Svo það var bara afslöppun á laugardeginum og við elduðum okkur svið um kvöldið í Grundargarðinum! mmm... svið eru alveg besti matur!

Á páskadag fór Þórunn svo í messu eins og alltaf á sunnudögum... hmm já eða næstum alltaf en Berta vinkona og Raggi voru að skíra stubbinn sinn sem kom í heiminn 15. jan sl. Hermann Veigar var það heillin, Hermann í höfuðið á pabba Ragga og Veigar í höfðuðið á Svenna bróður Bertu en hann heitir Sveinn Veigar. Svo var veisla heima hjá foreldrum Ragga þar sem Sigga mamma Bertu og hjálparkokkar hennar höfu galdrað fram dýrindis kræsingar!
Um kvöldið snæddum við svo páskalambið í Norðurhlíð svo það er óhætt að segja að ég fór ekki hungruð í rúmið þetta kvöld:)

Á mánudeginum var afslöppun í aðalhlutverki, fórum svo í mat uppí mývó og Stebbi og Lilja, foreldrar Nonna komu með. Snæddum lamb og svín... annar í páskum mikilvægur í átinu líka sko:)

Á þri.morgninum tók ég flug suður, hitti grasalækni sem gaf mér alveg bönns af grösum til að reyna að koma lagi á ólagið hjá mér, fór svo í blóðprufu í Læknasetrinu í Mjódd þar sem læknirinn minn á Húsavík gat ekki tekið blóð á svona helgum dögum. Fékk svo að taka því rólega heima hjá Helgu vinkonu mömmu og pabba þangað til Berta og Raggi komu í bæinn um kvöldið. Gisti hjá þeim, pizza og næs. Hermann litli var bara nokkuð hress, samt frekar þreyttur eftir ferðalagið og svo getur það nú tekið á að eignast 2 myndarleg nöfn svona á einu bretti! ;)
Berta hetja skutlaði mér svo á flugrútuna fyrir allar aldir á mið.morgunin og ég lenti á Arlanda uppúr hádegi en hér eru þeir komnir á sumartíma svo nú munar 2 tímum á Sví og Ísl.

Hér er svo bara búið að vera fínt veður, snjórinn að mestu farinn og sól skín í heiði. Nú eru það bara skólaverkefni sem bíða í stöflum, vonandi að helgin nýtist mér vel. Svo eru bara tæpar 3 vikur þar til Nonni minn kemur að heimsækja mig, ætlar að stoppa í 5 daga! :)

En jæja, held að þetta sé að mestu komið, var náttlega búin að skrifa miklu skemmtilegri pistil með alveg fullt af gríni og glensi en það er týnt og tröllum gefið núna!
En ég set nokkrar myndir í myndaalbúmið fljótlega og vonandi að bloggþolið sé aftur að aukast hjá mér;)

Ha det så bra mina vänner,
Þórunn

2005-04-02T12:53:00.000+02:00

Sko hvað maður er fínn!

2005-04-02T12:52:00.001+02:00

Hermann Veigar og Þórunn

2005-04-02T12:52:00.000+02:00

Berta, Raggi og Hermann litli í veislunni

2005-04-02T12:50:00.000+02:00

Svaladrykkir í kæli!

2005-04-02T12:49:00.000+02:00

Píslargöngusúpan snædd að göngu lokinni í Skútahrauni

ksss ksss... mjaaaaá!

2005-03-17T20:04:00.000+01:00

Cat's Prayer

Now I lay me down to sleep,
I pray this cushy life to keep.
I pray for toys that look like mice,
And sofa cushions, soft and nice.
I pray for gourmet kitty snacks,
And someone nice to scratch my back,
For windowsills all warm and bright,
For shadows to explore at night.
I pray I'll always stay real cool
And keep the secret feline rule -
To NEVER tell a human that
The world is really ruled by CATS!

Heimsmeistari í hálsríg 2005

2005-03-14T20:21:00.000+01:00

God dag god dag!

Hér er bara snjór og meiri snjór hvert sem litið er... ég var sko ekkert að koma hingað út til að hafa bara meiri vetur en er heima á fróni! Snjórinn nýtist mér bara ekki neitt hérna í Stokkhólminum, engar brekkur að renna sér í en ég hef hins vegar séð ofurhrausta svíja verið að potast á gönguskíðunum sínum hér og hvar um borgina. T.d. keyri ég alltaf í strætó framhjá Brunnsvíkinni (Brunnsviken) sem er hluti af öllu þessu vatnaflæði hér í borg, og þar er oft hægt að sjá fólk í löngum bunum að strunsa á skíðunum sínum! Gaman fyrir þau! amk en ég á engin gönguskíði og þó ég ætti þau kann ég ekkert að standa á þeim!

En það er þó eitt mjög jákvætt við svíja + snjó og það er að þeir salta götur og torg nánast ekkert! Í staðinn nota þeir möl og eru ekkert að spara hana. Eru t.d. mjög duglegir við að hreinsa göngustígana á háskólalóðinni jafnóðum og dreifa svo möl yfir. Svo er það orðið þannig að þar sem einusinni var malbikaður göngustígur er núna orðinn malarstígur með meiru... en þá fá götusópararnir nóg að gera í vor;) Gaman fyrir þá!
Þegar ég heimsótti Heimi og Guðrúnu í Kolding kynntist ég því smá hversu ótrúleg plága það er að nota salt á götur og gangstéttir því auðvitað berst grauturinn inn með skónum og verður vægast sagt subbulegt um að litast! Þá vil ég frekar þurfa annað slagið að plokka smásteina upp úr skónum mínum! hehe:)

Annars er ég í þann mund að setja heimsmet í hálsríg! Jaaaá þið vissuð kannski ekki að það væri keppt í því hérna í hólminum en svo virðist vera! Ég held sem sagt upp á 3ggja vikna hálsrígsafmæli í dag og á morgun verð ég komin á fjórðu viku! EKKI gaman fyrir mig! Ég er samt ekkert alveg að skilja reglurnar í þessari keppni og veit ekki hvernig er hægt að skrá sig út! og ég veit líka ekki hver skráði mig til keppni... gerði það amk ekki sjálf! En ég hef leitað til læknis, að vísu ekki hefðbundins því það hefði líklega ekki skilað neinu nema "hmmm... bólgablah og stífiblah og hér eru nokkrar bólgueyðandi többlur... bíddu í 2 vikur!" svo ég þefaði uppi nokkuð sem heitir Naprapati:) Naprapatar eru fólk sem sérhæfa sig í hrygg-, lið- og vöðvavandamálum og eru í sérstöku uppáhaldi hjá mér þessa dagana. Ég hef farið 3svar sinnum og ætla aftur á morgun.
Skondið með þessa Osteopata, Naprapata og Kiropraktora. Þau vinna bara með höndunum og geta gert með þaim kraftaverk! Ég vona allavega að hún Johanna Naprapati geri eitt slíkt kl. 16:00 á morgun... hihi;o)

Svo er ég líka farin að hlakka þokkalega til að koma heim um páskana!! Knúsa liðið mitt sundur og saman og ég vona svo sannarlega að heimsmestaramótinu verði lokið þá og ég þarf ekkert endilega að vinna... í þetta skiptið;

Sól upp: 06:08
Sól niður: 17:46

Adjö!

30 fúsund ár!

2005-03-08T13:35:00.000+01:00

Um síðustu helgi lagði ég land undir fót og kíkti yfir til Danmerkur til Heimis og Guðrúnar í Kolding. Ætla nú bara að byrja á því að þakka þeim fyrir móttökurnar og frábæra helgi... :o)
Ég flaug með Cimber Air, nennti ekki að skrölta í lest og eyða í það miklum tíma og líka mörgum peningum því það hefði líklega ekki verið neitt mikið ódýrara. En þetta er ekki nema rúmlega klukkutímaflug til Billund sem er rétt hjá Kolding og danirnir voru bara hressir á því, buðu upp á smörrebröd, öl og rauðvín í þessu stutta flugi! Hvað segja Flugleiðir um það?!?
En 30-afmælisveislan var sum sé á laugardeginum og gekk alveg frábærlega vel! Þau buðu heim til sín 13 manns og íbúðin er ekki nema ca 40 fermetrar svo það þurfti að skipuleggja vel;) Guðrún galdraði fram hina ljúffengustu rétti í mini-eldhúsinu og allir skemmtu sér vel! Á eftir var fjörinu haldið áfram á Republiken sem er uppáhalds skemmtistaðurinn í Kolding (hjá sumum amk;) og þar fengu þeir sem ekki komust fyrir heima hjá afmælisbarninu að berja undrið augum og væta kverkarnar og metta magana sína. Mikið stuð og mikið gaman <;o)

Sunnudagurinn fór að mestu í afslöppun og þynnku hjá sumum en til þess eru nú bara sumir sunnudagar! Ég flaug svo aftur til Stokkhólms á mán.morgninum... það var að vísu ekkert öl og rauðvín í það skiptið!!

Annars er bara ennþá snjór og vetur hér í Svíaríki en það fer vonandi að lagast... má alveg fara að koma vor mín vegna! #)

Orð dagsins: Hippopotomonstrosesquippedaliophobia
þýð. fóbía fyrir löngum orðum!!

2005-03-08T13:23:00.000+01:00

Veislusalurinn áður en fjörið hófst

2005-03-08T13:22:00.000+01:00

Skötuhjúin sæt og sælleg ;o)

2005-03-08T13:21:00.000+01:00

Aggi og Elvis tóku frumsamið lag Agga tileinkað Heimi

2005-03-03T21:07:00.000+01:00

Sætar systur saman í Stokkhólmi :) ... segðu!

Hildarheimsókn

2005-03-03T19:48:00.000+01:00

jæja, orðið langt síðan síðast!
Byrja á því að óska mömmunni minni til hamingju með daginn! <;o)
En það sem helst hefur á daga mína drifið var að Hildur systir kom í heimsókn síðustu helgi, kom á föstudagsmorguninn og ég hitti hana á flugvellinum. Það voru fagnaðarfundir;) Um kvöldið fórum við á uppáhaldsveitingastaðinn minn (hingað til amk, hef nú ekki farið á mjög marga) en það var kúbverski staðurinn La Habana. Í þetta skiptið fékk ég mér grillaðan túnfisk og Hildur braggðaði á grilluðum sverðfisk! Hvort tveggja MJÖG ljúffengt!
Á laugardaginn tókum við rúnt í bæinn og VERSLUÐUM! Mikið skemmtilegt að hafa loksnins einhvern sniðugan til að versla með... annars finnst mér oft gott að vera ein að þvælast í búðum! Tókum því svo rólega heima með pizzu um kvöldið.
Á sunnudaginn gerðumst við menningarvitar og heimsóttum Nordiska Museet sem var ok en fórum svo á flottasta safnið í Stokkhólmi (af þeim sem ég hef séð...hehe) en það er Vasa Museet! Þetta var í 3. skiptið sem ég skoða safnið og aldrei að vita nema að ég kíki aftur við... alltaf jafn flott! En þeir eru í mesta basli með að varðveita fleyið, einhver efnasambönd valda því að brennisteinn fellur út í timbirnu og það sést augljóslega þar sem það myndast gulir blettir þar sem brennisteinninn herjar! Ekki gott!! Því næst röltum við smá um í Gamla Stan (gamla bænum) sem er alveg annar heimur miðað við ys og þys á öðrum strætum Stokkhólms;) mjóar götur og fjölmörg falleg hús. Þess má geta að mjósta gata Stokkhólms er í Gamla Stan eða 90cm! Þaðan fórum við í Naturhistoriska riksmuseet og í Cosmanova sem er "bíó sýningarsalur" með þrívíddarskjá sem hefur stærstu upplausn í heimi!! Voða flott, sáum mynd um eldfjöll sjávarbotnsins;) fræðandi... amk það sem við skildum!
Svo var það rólegt kvöld heima:)
Það var algjört æði að fá litlu systur í heimsókn, ekki síst þar sem alls kyns kvillar hafa verið að hrjá mig síðustu vikur... þursabit í hálsinum og bólgur við bringubein. Hef verið slæm í hálsinum í næstum 2 vikur og alveg orðin þreytt á því! Fór því í dag til Naprapata sem vinnur m.a. með nudd. Þetta var alveg snilld og akkúrat það sem ég þurfti held ég, hún hamaðist alveg á hnútum og stífum vöðvum og hnykkti meirað segja hálsinum sem mig hefur dreymt um síðan ég fór í síðasta tímann til ostapatans míns á Akureyri! ;) Nú get ég amk hreyft höfuðið einar 110° eða svo!

En svo er ég að fara til Danmerkur á morgun og ætla að heimsækja Heimi og Guðrúnu í Koldin yfir helgina. Heimir ætlar að eiga stórafmæli á sunnudaginn og kannski við fáum okkur afmælisköku saman <;o)

Fleiri myndir frá Hildarheimsókninni má sjá í albúminu:)

Sól upp: 06:40
Sól niður: 17:19

Góðar stundir:)

Strætósögur

2005-02-23T23:18:00.000+01:00

Almenningssamgöngur í Stokkhólmi eru fínar að mörgu leiti, oftast komast allir leiðar sinnar án mikilla vandræða. Hins vegar eru mörg ólík kerfi í gangi og það flækir málið oft pínu. Eitt heitir Tunnelbana og er það neðanjarðarlestarkerfi að lang mestu leiti. Þar eru hins vegar bara 3 línur og því frekar takmarkað ef þú ætlar eitthvað lengra en bara rúnt í kringum miðborgina. Þá stendur þér til boða að taka Pendeltåg sem er með 2 línur minnir mig (ég nota pendeltåg til að fara niðrí miðbæ, 7 mín í lestinni). Svo er eitt sem heitir Roslagsbana sem fer eitthvað ákveðið... man ekkert hvert en er sum sé ein lína fram og til baka. Held að það sé amk 1 eða 2 línur í viðbót. fyrir utan þetta er náttlega strætó. Svo það er oft pússlusússl þegar á að fara eitthvað. Eeeen það er svo sem attlæ.
Hins vegar hefur aumingja strætó átt erfitt með að halda áætlun í snjónum sem hefur kyngt niður síðasta sólarhring eða svo og bættist við það sem kom fyrir nokkrum dögum svo þetta er alveg dágóður slatti! Ekki óalgengt að strætó sé 7-10 mín of seinn. Að vísu eru þeir ágætlega settir hér í Svíþjóð þar sem þeir nota yfirleitt vetrardekk, margir á nöglum en t.d. var Heimir að segja mér að þeir mættu ekki nota nagladekk í Danmörku og laaang flestir eru á sumardekkjum. Þar er nú líka snjór og væntanlega eitthvað kaos í gangi þar.

Svona er Stokkhólmur í dag!

En þrátt fyrir óstundvísi strætó af og til eru fjölmargir sem burra með á hverjum degi... stundum jafnvel OF margir. Lenti í því um daginn að ég var búin að koma mér vel fyrir í strætó og ætlaði að byrja á strætó-íhugununni og afslöppun sem ég stunda gjarnan mér til dægrastyttingar og heilsubótar en kemur þá ekki heill her af skólabörnum og fyllir upp í hvert einasta gap í strætó!! Þetta varð til þess að fyrir utan taugaveiklun og uppstress missti ég af stoppinu mínu því krakkaskarinn stoppaði upp í útganginn og bílstjórinn sá ekki SOS veifið mitt og brunaði af stað!! Svo ég fékk extra líkamsrækt þann daginn;)
Svo gerðist það aftur í dag að upp í fullan strætó komu 50 skólabörn í viðbót!! skil ekki alveg hvernig það gekk en það var bara troðið! Sem betur fer fór skarinn af á sama stað og ég, missti því ekki af stoppinu í það skiptið.

Soluppgång: 07:03
Solnedgång: 16:59

Hej så länge!

Þorramatur og fiskisúpa

2005-02-19T11:40:00.000+01:00

Ég átti alveg eftir að segja frá Þorrablótinu sem var fyrir viku síðan. Undanfarin ár hefur verið frekar dræm mætin á Stokkhólmsblótin og í fyrr voru eitthvað um 30 manns!! En í ár gekk þetta mun betur og það mættu 270 stykki!! Ég mætti þarna galvösk og til í hákarl og súrmeti en bekkjarsystir mín hafði ætlað að koma með en klúðraði því á síðustu stundu... var alltof sein og fór svo út á vitlausri lestarstöð... en það var kannski bara ok því hún hefði pottþétt EKKI skilið brandarana hans Ómars Ragnarssonar!!! amk náði ég þeim ekki nærri öllum! :/ En ég hitti svo Sendiherrahjónin, Svavar Gestsson og Guðrúnu Ásústdóttur og dóttur hennar, Gunnhildi frænku mína sem ég hef ekki hitt í amk 10 ár! Svo það var gaman og ég fékk svo sæti við borðið hjá þeim en það var erfitt að finna sæti því það komu mun fleiri en búist hafði verið við! Nú, Ómar var sum sé veislustjóri og "skemmtikraftur" og hann var sko alveg eins og hann var fyrir 20-30 árum... veifaði höndum og fótum í allar áttir og þaut um sviðið, hoppandi og stappandi eins og óður væri! En það versta var að brandararnir voru líka flestir 20-30 ára og frekar hallærislegir og jafnvel óviðeigandi!! Honum fannst mjög gaman að kalla þau Svavar og Guðrúnu upp á svið og láta þau gera hitt og þetta... t.d. var eitt númerið að hann kallaði þau upp á svið ásamt öðrum "sjálfboðaliðum" til að leika HÚSDÝR! Svavar var boli og Guðrún belja og svo voru þarna hænsn, kindur og hestar... svo söng Ómar.. "hænan gaggaði goggolígó og vakti þar með kisu..." eða hvernig sem þetta var og þá átti aumingjans fólkið að gala, baula, hneggja eða mjálma eftir því sem við átti!! Þetta fannst Ómari voða gaman!
En maturinn var nokkuð góður.. ekki jafn góður og súrmaturinn sem afi og amma á Strönd græja en það er líka ekki hægt! :) En þetta var matur sendur frá Íslandi og það gekk víst ekki þrautarlaust að leysa gummsið út úr tollinum hjá svenskurunum! og þurfti sendiherrann að beita sér öllum til að díla við tollarana.

Tollari: "Hva... er ekki nógur matur til í Svíþjóð?"
Svavar: "jújújú en þetta er sko sérstakur gamall ÍSLENSKUR matur"
Tollari: "Jaha og hvernig þá?"
Svavar: "jú sjáðu þetta eru svona súr hrútseistu..."
Tolli: "VA! hrútseistu?!?!"
Svavar: "já og kindahöfuð"
Tolli: "Kindahöfuð.. en hvað gerið þið við tunguna??"
Svavar: "já sko hún er í"
Tolli: "ER TUNGAN Í???"
Svavar: "já höfuðin eru klofin..."
Tolli: "KLOFIN KINDAHÖFUÐ!?!?!"

Og þannig gekk þetta víst einhverja stund þar til Svavari tókst einhvern vegin að sannfæra aumingjans sænsku tollverðina að þetta væri ekkert mikið eitrað og þeir yrðu að hleypa þessu inn!
Svo átu allir eins og þeir gátu og íslenska hljómsveitin KUSK frá Vestfjörðum spilaði fyrir dansi! Ég fór nú frekar snemma heim (á íslenskum mælikvarða) því Pendeltåg lestirnar hætta að gana rétt um kl. 01.
En í heildina bara mjög fínt kvöld:)

Ég fór í Historiska Museet (sænska þjóðminjasafnið) á miðvikudaginn og skoðaði víkingasýninguna þar. Það var áhugaverð og býsna skemmtilega fram sett sýning að mörgu leyti.
Andrúmsloftið á safninu var frekar þurrt, engin hljóð nema bara suð og
hávaði í allskonar ljóskösturum og myndvörpum... mér fannst það skemma
stemninguna pínu. Svo fannst mér líka að dótið sem var þarna til sýnis
(mikið af skartgripum, vopnum og þannig) væri hálf fjarlægt því það var allt
læst inni í glerskápum. Reyndar voru rúnasteinarnir ekkert innilokaðir og
settu skemmtilegan svip á sýninguna.

Á fimmtudaginn var mér svo boðið í mat til sendiherrahjónanna og auk þess voru þar Gunnhildur frænka og hennar kæró og eitt annað íslenskt par sem hefur lengi búið í Svíþjóð. Fengum ljúffenga fiskisúpu og allskyns góðgæti. Sendiherrabústaðurinn er á Strandvägen sem er en dýrasta gatan í Stokkhólmi enda var þetta ekkert hreysi svo sem!!! Ótrúlega falleg bygging sem íbúðin er í, týpisk fyrir Stokkhólm og inni var mjög hátt til lofts og vítt til veggja. Fullt af málverkum eftir íslenska listamenn í eigu þeirra hjóna en líka frá listasöfnum á Íslandi. En bara mjög glæsileg og hlýleg íbúð og skemmtilegt kvöld! ;o)

Held ég segi þetta bara gott í bili.
Trevlig helg! :)
Þórunn

Skapstirðir í snjónum!

2005-02-15T18:07:00.000+01:00

Hér er bara mikill snjór og Svíjarnir skilja ekkert í þessu. Í gær enduðu 400 stokkhólmarar á bráðamóttöku með brotin bein, 79 bílslys tilkynnt til lögreglu og allar almenningssamgöngur gengu úr skorðum. Ég verð nú líka að viðurkenna að þetta er slatta mikill snjór... kannski ekki eins brjálæðislega mikið og snjóaði þarna á einni nóttu rétt fyrir jólin á Húsavík... en kannski einir 20-35 cm.

Í gær kynntist ég því líka að svíjar eru ekkert rosalega færir að keyra í snjó... amk ekki þeir sem ég sá til! Ég hitti sænska stelpu sem ég hafði talað við fyrir áramót þegar ég var á Húsavík og við hittumst niðrí bæ, snæddum saman og ákváðum svo að fara í bíó. Hún var á bíl og áður en við fórum í bíóið keyrðum við heim til hennar. Það gekk svo sem ágætlega en þegar við vorum á leiðinni heiman frá henni aftur kom babb í bátinn... eða bílinn kannski frekar(bíllin var einhver japönsk dós á sléttum sumardekkjum by the way). Til að bakka frá húsinu þurfti hún að fara niður smá halla og beygja svo upp smá brekku til að komast á veginn. En það var sum sé snjór og hálka og flickan bara gaf allt í botn og spólaði og spólaði... stoppaði svo smá og spólaði svo meira! Ég reyndi eitthvað að vera gáfuleg og segja henni til og fór svo út að ýta, nema hvað! Var ekki búin að reyna lengi þegar pabbi stelpunnar kom út og ætlaði að redda málunum. Kom æðandi með skóflu æpandi að svona gerði maður ekki!! Fór og sótti sand í sandkassa við veginn og dreifði honum við hjólin og smá fyrir framan bílinn. Mér leist ekkert illa á þetta hjá honum svo sem en þegar hann settist undir stýrið kom í ljós að hann var engu skárri en stelpan... verri ef eitthvað var... "spóli spóli spól!", keyrði fram og til baka og gaf inn svona eins og Ómar gerði í rallinu í denn! Jæja, ég og flickan lögðumst á húddið og ýttum af öllu afli, hún reyndar lá mest í götunni en á endanum komst bíldósin úr úr stæðinu og upp á veginn. En þar með var ekki öllu lokið því það var ein brekka eftir til að komast út úr götunni. Flickan var orðin eitthvað stressuð og eftir að hafa séð hvað ég var dugleg að ýta bílnum spurði hún mig hvort ég vildi ekki bara keyra! hehehe;) mér leist svo sem ekkert illa á það og í stað þess að spæna af stað með töffarareyk á eftir drossíunni lullaði ég þetta rólega í fyrsta og pabbinn stóð og veifaði bak við okkur! :)
En við sáum svo myndina "A very long engagement", frönsk með sænskum texta svo það var ágætis æfing;) Góð mynd!

Nú er það þannig í Stokkhólmi að ekki má keyra hraðar en á 30 km/klst frá og með deginum í gær!!! Þeir lækkuðu hámarkshraðann úr 50 í 30 á flestum götum Stokkhólms meðan áður var það bara kringum skóla og leiksvæði barna sem var 30! Menn eru nú eitthvað missáttir við þetta, t.d. eru leigubílstjórar æfir og strætóbílstjórar brosa ekkert út að eyrum því þeir segjast ekki getað haldið áætluninni á 30. En það eru margir kostir og ókostir við þetta, kostur er að bílslys verða kannski ekki eins harkaleg (þ.e. ef fólk fer almennt eftir þessu) en ókostur er t.d. að mengun verður almennt meiri per bíl þar sem hann er væntanlega lengur að keyra frá A til B á 30 en á 50!
Nú, þeir sem eru svona svartir á þetta geta þá bara selt bílinn sinn og keypt sér far með æfareiðum leigutaxastjóra eða skoppað uppí strætó með Stinna Skapstirða!

soluppgång: 07:25
solnedgång: 16:39

Ef þú smælar framan í heiminn, smælar heimurinn framan í þig <;o)

Meiri snjór í Stokkhólmi

2005-02-13T13:01:00.000+01:00

Meiri snjór meiri snjór

Í nótt hefur snjóað talsvert mikið í henni Svíþjóð. "Óveður" gekk yfir suðurhluta landsins og upp til Stokkhólms og um 17.000 manns eru án rafmagns, flestir í Skåne. Aumingja Svíjar... alltaf eitthvað vesen hjá þeim...
Það snjóar enn hér í Stokkhólmi en það er ekki mikill vindur svo þetta er bara notalegt:)

Bið að heilsa í bili, Þórunn.

2005-02-13T13:00:00.000+01:00

Stokkhólmur í morunsárið

Búri bítur! og tásutrauma!

2005-02-11T16:28:00.000+01:00

Vináttuferlið milli mín og Búra Búrasonar hafði staðið í stað í nokkurn tíma svo ég ákvað í fyrradag að reyna að halda áfram þar sem frá var horfið. Opnaði búrið og Búri hnusaði út í loftið og vissi ekkert alveg hvað hann átti að gera svo ég steig fyrsta skrefið og reyndi að strjúka honum, hann tók því ekki beint illa en gaf ekki mikið út á það. Svo ég ákvað að stíga næsta skref og taka greyið út úr búrinu og leyfa honum að skoða heiminn... en Búri var ekkert hrifinn af svona náinni snertingu og þrykkti löngu beittu tönnunum í puttann á mér!! Áiiiii, búrahamstrar geta greinilega bitið fast ef þeir þurfa þess. Ég kippti hendinni út og skellti aftur búrinu og síðan hefur verið alger pattstaða hjá okkur Búra. Veit ekki hvenær/hvort ég reyni aftur.

Þó ég hafi verið nokkuð særð eftir Búra þá er nú annað verra og það er enn eitt tásutilfellið mitt! Hvað er þetta með þessar tær... þurfa þær alltaf að vera til vandræða??? Nú er það þannig að nöglin á stóru tánni hefur ákveðið að vaxa inní tánna eftir síðustu naglaklippingu! Það var svo orðið þannig að ég svaf ekki mikið í nótt vegna verkja og ákvað því að drífa mig til læknis í morgun. Hringdi á heilsugæslustöðina í Solna en þar sem að ég var ekki með sænska kennitölu, fékk kennitölu þegar ég skráði mig inní skólann en hún er ekki venjuleg sænsk því hún endar á P860, og það er sum sé þetta Pé sem var vandamálið. Konan sem ég talaði við gat ekkert gert fyrir mig út af þessu Pé-i, þurfti að vera sænsk eða með massa af pappírum um tryggingarnar mínar sem ég hafði ekki!! Ég taldi mig vera með tryggingu þar sem ég keypti farið hingað út með MasterCard og þá fær maður ferðatryggingu sjálfkrafa en þegar á reyndi er þessi ferðatrygging ekki gild fyrir mig því ég er hér við nám!! Nú jæja, ég var samt búin að fá tíma annars staðar og ákvað að halda honum þó ég þyrfti að borga allt sjálf sem reyndist svo vera 10.000 ISK!!! Hjá lækninum fékk ég fína þjónustu, þær gerðu að sárum mínum og gáfu mér lyfseðil fyrir sýklalyfjum. Ég fór svo í apótekið en það tók nú tímann sinn! Svíjar eru nebblega svo ótrúlega akkúrat, það er allt svo pottþétt og klappað og klárt og ef þeir vita ekki alveg hvernig á að flokka eða skrá eitthvað lenda þeir í hálfgerðri tilvistarkreppu. Amk held ég að konan sem afgreiddi mig í apótekinu hafi átt mjög bágt því af því að kennitalan mín var með Pé-i í og nafnið mitt var frekar Ó-sænkst þurfti hún að fá hjálp frá amk 2 kollegum áður en ég fékk þessar 10stk sýklalyfstöbblur! En það hafðist fyrir rest og nú er ég með risaumbúðir með slaufu á um tána og vona að ástandið verði betra á morgun. Ég á nefnilega tvo miða á þorrablót Íslendingafélagsins og mig langar voða mikið í þorramat!!! :)

Fallegt veður í dag, sól og einar 4 gráður.

Sól upp: 07:35

og niður: 16:29

Hej så länge,
Þórunn

Frrrrrrooooooosssssst!

2005-02-11T16:26:00.000+01:00

Elva vinkon sendi mér þessar myndir um daginn:) ... fannst þær ansi hreint magnaðar.

2005-02-11T16:24:00.000+01:00

Bbrrrrrrr...

2005-02-11T16:23:00.000+01:00

Hvar er nu ruduskafan goda!?!

Mitt rum!

2005-02-08T23:06:00.000+01:00

...lohksins pohksins hefur mér tekist að birta myndir hér beint á bloggið! er ekkert mjög góð í þessu tæknilega!

En þetta eru sum sé myndir af herberginu mínu;) fjólublátt eller hur?! held þetta sé bara í fyrsta skiptið sem ég sef í fjólubláu herbergi og það hefur bara gengið vonum framar verð ég að segja! Annars er þetta mjög þægilegt hérna, ég er með mitt eigið baðherbergi en aðgang að eldhúsinu og stofunni hjá dúddanum og öllu því sem þar er! ...eða næstum öllu. Ég hef ekki enn náð að mynda tilfinningatengsl við hamsturinn sem ég kýs nú að kalla Búra Búrason því hann er svo loðinn og búralegur eitthvað! Er viss um að kisunum mínum þætti Búri mun áhugaverðari en mér, væri spennandi stefnumót!!

Það eina sem mér finnst neikvætt og óþarflega mikið maus er að þvo þvottinn minn!! Það er þvottahús í kjallaranum og ekkert að því, toppþvottahús! En til að hafa einhverja reglu á hlutunum þurfa íbúarnir í blokkinni að bóka tíma sem er ok nema að það er náttlega bara einn lykill fyrir íbúð 601 svo þegar Mikael er búinn að bóka tíma kannski 4 daga fram í tímann hef ég engin "lyklavöld" og þegar kemur að degi 4 og þvottatími fyrir 601 liðinn er Mikael að sjálfsögðu búinn að bóka aftur næst eftir 5 daga... hvenær á Þórunn að bóka??? :/ Ég ætlaði nú fyrst að leysa málið á mjög einfaldann hátt og þvo bara minn þvott eftir síðasta session eða kl 22:00. Eeeeeen, þá er það víst þannig að rafmagnið er tekið af þvottahúsinu kl. 23:00! "Bannað að þvo eftir kl. 22:00 Þórunn... hahahaha!" sagði húsvörðurinn. Jæja svo þegar ég var búin að nota allar spjarir amk einu sinni í fataskápnum neyddist ég til að vakna kl. 07:00 á LAUGARDAGSMORGNI(þar sem enginn hafði bókað þann tíma enda ekki mannúðlegur fótaferðatími!!) til að þvo naríurnar mínar!

Vona að þið hafið fengið bollur á mánudaginn og saltkjöt í dag! Sænski bolludagurinn var hér á sunnudaginn sl. og ég fékk mér eina bollu bara svona til að vera með... en bollurnar hér eru ekkert almennilegar Bolludagsollur! Bara til gerbollur og þær líta næstum allar eins út: sundurskornar með rjómahlassi á milli og flórsykri stráð yfir! Ég gerði mér nú ekkert háar vonir þegar bollan var komin á diskinn minn en... þessi bollubolla kom skemmtilega á óvart! Inní var nebblega fylling, eitthvað marsípan-vanillu-gums og smakkaðist þetta bara fj... vel eftir allt saman;) Held ég klæði mig samt ekki í undarleg föt á morgun og arki sönglandi um stræti Stokkhólms!! ;o)

Sólarupprás: 07:43

Sólsetur: 16:21

Orð dagsins: Spårvagnsaktiebolagsskensmutsskutarefackföreningspersonalsbeklädnadsförrådsförvaltaren
Ef þið eruð með tillögur af þýðingu... tja, ekki vera feimin! ;)

Hej då!

2005-02-08T20:55:00.000+01:00

Ballonggatan 17

2005-02-08T20:54:00.000+01:00

Herbergid mitt a Ballonggatan 17

2005-02-08T20:50:00.000+01:00

ég er að verda helv... góð að græja þessar myndir:)

2005-02-08T20:43:00.000+01:00

Haukur a siglingu

Pollo Frito "Pio Pio", SoFo og auðvitað veðrið

2005-02-06T18:49:00.000+01:00

Tjäna alla glada!

ljómandi fín helgi alveg hér í Stokkhólmi!
Á fimmtudaginn vorum við nokkur búin að plana að kíkja í bæinn eftir skóla, fá okkur kaffi og með því. Svíjar hafa sérstakan frasa yfir það: gå och fika! og þeir fá sér að "fika" alveg í gríð og erg. En nóg um það, það voru nokkuð margir búnir að melda sig en svo þegar kom að því að fara og fika þá enduðum við 3! 2 voru veik og svo ýmsar aðrar ástæður. En það var bara fínt, ég Pia frá Finnlandi og Sandrine frá Frakklandi röltum okkur niðrí bæ og settumst inná kaffihús og fljótlega var ákveðið að það mætti tala ensku í þetta skiptið þar sem samræðurnar verða aldrei neitt djúsí á sænskunni;) Sandrine heltist svo úr lestinni þar sem hún þurfti að fara að vinna en ég og Pia fengum okkur 1 öl og röltum svo áfram. Höfðum lesið um einn ákveðinn restaurant sem okkur langaði mikið að taka út. Það var kúbanski staðurinn La Habana og er hann fyrst kúbanski staðurinn sem var opnaður í Stokkhólmi. Inni var ilmandi vindlalykt og nokkuð notalegt andrúmsloft. Ég fékk mér kjúkling: PLLO FRITO "PIO PIO" og þetta var líka svona ótrúlega ljúffengt! Mæli hiklaust með þessum stað fyrir ykkur sem eruð koma til Stokkhólms! :) Fengum okkur meiraðsegja vindil í eftirrétt... já eða sko súkkulaðivindil hehe!

Á föstudeginum tók ég því mjög rólega, er yfirleitt ekki í tímum á föstudögum svo það ágætt að nota tímann í annað. En á laugardeginum hitti ég Piu aftur og við fórum og tókum Södermalm út. Södermalm er ein af eyjunum fjölmörgu sem Stokkhólmur er byggð á og er fyrir neðan Gamla Stan (fyrir þá sem til þekkja). Þessi hluti borgarinnar var á árum áður mest byggður verkamannabústöðum en hefur á síðustu áratugum breyst í það að vera mjög "trendy" svæði. Mikið af verslunum, bæði tísku og second-hand og hægt að finna þar flest milli himins og jarðar! Ungt fólk sækir mikið þangað og hafa kaffihús og krár sprottið upp út um allt. Líkt og SoHo (vísar til vissra gatna eða South of Houston) í New York kalla Svíjarnir þennan hluta Södermalm SoFo (South of Folkungagatan). Við keyptum nú ekki mikið og því árangur ferðarinnar ekki metinn í kílóavís en ég keypti þó einn forlátan olíulampa á loppumarkaði! Gulur úr gleri, voða fínn en ég á eftir að sjá hvort hann virkar;)

Í dag er hvíldardagurinn svo ég ákvað að vera bara heima, lesa lexurnar mínar og láta til mín taka í tiltekt! Það er nú óskaplega létt og löðurmannlegt verk þar sem þetta eru nú engin víðfermi sem ég þarf að þrífa, 1 x herbergi og 1 x baðherbergi!! Ansi ljúft og þarf ekki mjög mikinn kjark til að byrja á því:o)

Eitt að lokum... segir maður kúbanskur eða kúbverskur??? hvað haldið þið?

Snjórinn fór í dag og ég held að það séu bara einar 3-4 gráður úti.
Sólarupprás 07:47
Sólsetur 16:16

Hej så länge!

Fréttir af mandarínum, öli og veðri

2005-02-02T20:57:00.000+01:00

Aldeilis alveg passlega langt síðan síðast... eða hvað!

Lífið gengur sinn "vanagang" hér í Stokkhólmi, skólinn í góðum gír og alltaf síast eitt og eitt orð varlega inn held ég bara:)
En það er ótrúlega fyndið hvað gerist í heilaling þegar maður er mótiveraður og fyrst og fremst með hugann við það að stimpla inn orð og setningar sem æða að manni úr öllum áttum. Ég hef nokkrum sinnum rekið mig á það að þegar ég ætla að reyna að segja eða muna eitthvað á ensku þá er bara allt "blanco" og ég bara stama eins og gömul kind! T.d. var ég í gær stödd í Konsum matvörubúðinni þegar að mér kemur maður og spyr mig á ensku hvort ég geti hjálpað honum örlítið. Ég heyri alveg að manni er að tala ensku við mig og skil alveg hvað hann er að segja en samt svara ég um hæl: "Jovisst! ehh... of course!". Strákgreyið langaði svo voða mikið að vita hvað mandarínurnar kostuðu mikið en hann fann hvergi verðmiða sem var líklegur. Við reyndum eitthvað að finna út úr þessu og ég blandaði svona líka skemmtilega saman ensku og sænsku... kallast Svengelska öðru nafni á sænsku :) Fundum engan verðmiða og ég held að maðurinn hafi ekki hætt á það kaupa þessar dularfullu mandarínur af hræðslu við ofurhátt sænskt matvöruverð! "Þið ættuð þá að koma til Íslands" segi ég nú bara!

Jæja, en á föstudagskvöldið kíkti ég aðeins út á lífið, franska stelpan sem er í bekknum mínum bauð mér í partýi á kampus sem var reyndar á vegum laganema. Eníveis, ég dreif mig þangað eftir hressandi sprikl í ræktinni og þetta var bara svona týpiskt sænskt stúdentapartý! "Ódýr" bjór seldur á dælu og ærandi píkupopp frá diskógólfinu þar sem 5 stelpur stóðu í hring og dilluðu sér. Ég var nú ekki viss um að endast lengi þarna en þá var mér boðið að vera með í einhverjum partýleik (sem mig minnir að þeir hafi kallað "kaps" eða eitthvað...) sem var verið að fara að spila í einhverju bakherbergi. Þetta var sem sagt drykkjuleikur þar sem allir sátu í hring á gólfinu og mitt inní hringnum átti hver sitt glas með botnfylli af öli. Svo var massa af bjórflöskutöppum útdeilt til allra og svo snerist leikurinn um það að þú áttir að reyna að henda tappa ofan í glasið hjá einhverjum. Ef þú hittir, á eigandi glassins að reyna að hitta í þitt glas og þannig gengur það milli þessara tveggja þar til annar feilar. Þá á sá að drekka það sem er í glasinu, að vísu ekki tappana sjálfa. Svona hélt þetta áfram býsna lengi og fljótlega var ekki mikið um þurra bletti á gólfinu! Aaasch! Á endanum ákvað ég að forða mér áður en ég klístraðist föst við gólfið!! Sniðugir svíjar... eehe eehe! :/
Drykkjumenning svíja er sum sé ekkert mjög ólík okkar Íslendinga! Tyvärr!

Verður maður ekki alltaf að minnast smá á veðrið... Svíjum, eins og Englendingum, finnst fátt skemmtilegra að tala um en veðrið... tala nú ekki um ef þeir fá að standa í biðröð samtímis!
Veðrið er fínt, ennþá smá snjóslykja og hiti yfirleitt á bilinu -2 til +3 gráður.

Held ég láti bara hér við sitja að sinni og segi:

Skål!

Myndir frá USA

2005-01-30T01:56:00.000+01:00

Hér er linkur inn á myndaalbúm sem ég hef verið að græja. Enn eru þarna bara myndir frá USA og nokkrar af kisunum mínum ;) Bæti við fleirum á næstu dögum!

Myndaalbúm

Hej då!

Íslendingar á vissum stöðum!

2005-01-28T15:20:00.000+01:00

Það var nú alveg fyndið það sem gerðist í gær...
Ég var á leiðinni heim úr skólanum og ákvað nú að fara og versla eitthvað í búið. Fór í verslunarmiðstöðina sem er hérna í hverfinu, Solna Center, sem var nú ekki í frásögur færandi nema að ég ákvað að fara í "ríkið" og er það NB í fyrsta skiptið sem ég geri það síðan ég kom hingað fyrir rúmum tveimur vikum. En það er sama fyrirkomulag hjá Svíjum og Íslendingum þ.e. að einungis er hægt að kaupa áfengi hjá ríkinu á alveg uppsprengdu verði! Nema hvað, ég fór inn í búðina og ég þurfti að líta aftur á skiltið fyrir ofan dyrnar... er ég örugglega á réttum stað... jú, "System Bolaget" stóð þarna skírum stöfum en þetta leit ekkert út fyrir að vera áfengisverslun. Hér er nebblega gamli hátturinn á "over-the-counter" afgreiðsla! Eru held ég nokkrar þannig búðir eftir á Íslandi, amk fór ég í eina slíka á Grundarfirði sumarið 2003. En hér var líka númerakerfi svo þegar þú komst inn tókstu númer. Svo ef þú varst nú ekki alveg búinn að ákveða hvurs lags drukk þú ætlaðir að kaupa gastu gengið í hringi um "búðina" og skoðað úrvalið í sýningarglerskápum!! hahaha... bara fyndið:) Búðarborðið minnti svolítið á gjaldkeraborðin í banka nema ekkert gler. Svo pantaði ég það sem mér hafði litist vel á í útstillingunni og afgreiðslukonan tók svona innkaupakerruvagn og fór inn á lager að sækja góssið! Ég borgaði svo konunni og þegar ég var búin að setja í pokann og um það bil að labba í burtu sá hún voða mikið eftir því að hafa ekki spurt mig um skilríki (jeeeeejjjííí!) og bað mig vinsamlegast um að gera svo!! Ég samt búin að borga fyrir brúsann og með ölið í pokanum á leiðinni út!! En jæja, rétt skal vera rétt og ég rétti henni ökuskýrteinið mitt. En þá kom það fyndna í ljós að afgreiðslukonan var ÍSLENSK! já og við byrjuðum aðeins að spjalla svona um daginn og veginn og veðrið og svo spyr hún mig hvort ég ætli á þorrablótið? ÞORRABLÓT! Ég vissi ekki að það væri þorrablót í Stokkhólmi en svo er víst, Íslendingafélagið heldur þorrablót 15. feb. Ef mér tekst að plata einhvern grunlausan með mér ætla ég SKO að fara... elska þorramat! En jæja, þegar kallinn á eftir mér í röðinni var farinn að muldra og blóta eitthvað á sænsku ákvað ég nú bara að kveðja íslensku "ríkiskonuna" í bili... hitti hana kannski aftur á þorrablótinu! :)
En það sem er líka fyndið og ég fattaði eiginalega ekki fyrr en ég var að labba heim er að þegar ég var í Kalmar vorið 2002 hitti ég allan þann tíma bara einn Íslending, og það var líka í "ríkinu" og hún var á kassanum og ég rétti henni íslenska ökuskírteinið mitt og bang!! byrjuðum að blabbla á íslensku á fullu! hahaha:) Hvað er þetta með Íslenskar konur að vinna á kassa í System Bolaget í Svíþjóð...? getur einhver gefið skynsamlega skýringu á því? Ég er enn að reyna að finna út úr þessu.

En jæja, ég hef verið að reyna að koma upp myndaalbúmi hér og er komin áleiðis. Það ætti að birtast hér innan skamms.
Þangað til, bið ég að heilsa öllum og eigið góða helgi!!! <;o)

Hej då!

Áramótin 2004-2005 í New York !

2005-01-26T23:48:00.000+01:00

Pistill um ferðalag Þórunnar og Nonna til USA 27.des til 6.jan sl.

Eins og ég minntist á fyrir nokkru eyddum við Nonni áramótunum síðustu í New York. Við fundum fínasta netsmell á icelandair.com og skelltum okkur til USA í nokkra daga. Við flugum til Baltimore seinnipartinn þ. 27.des. og tók flugið 6.5 tíma sem bara alveg nóg því við hliðina á mér sat stelpa með kvef... og það voru snýtuklútar svífandi um loftið hægði vinstri! Kem betur að snýtuklútunum síðar. Tókum svo strax lest upp til New York eftir að okkur hafði verið hleypt inn í landið. Í checkinu voru tekin fingraför af hverjum og einum og einnig ljósmynd (bannað-að-brosa-mynd!). Hótelið sem við gistum á í 6 nætur heitir Ramada New Yorker og er yfir 1000 herbergja hótel á frábærum stað á Manhattan. Þar sem að hótelið er ekkert alveg glænýtt, svona frekar í eldri kantinum en samt snyrtilegt og með öllum helstu nauðsynjum+, auk þess að vera svona stórt kom verðið skemmtilega á óvart eða um 85.þús f. 6 nætur (og þar með dýrustu næturnar sem eru í kringum gamlárs!). "Herbergið" okkar var heldur ekkert slor, risastórt svefnherbergi með tv og 1 baðherbergi, svo var setustofa með öðru tv og baðherbergi nr. 2 ;) Við vorum á 36. hæð og þegar maður var að horfa á tv, sem var nú ekkert svo frábært, mest auglýsingar, var einfaldlega hægt að gjóa augunum út um gluggan og þar blasti gamli Empire State við með jólaljósaskreytinguna sína :) Fyrsta daginn byrjuðum við á að labba okkur á Time Square og tékka á dýrðinni. Nonni, sem var þarna í fyrsta skipti, var álíka ruggglaður og ég var þegar ég var þarna fyrir 1.5 ári síðan. Þetta er líka engu líkt! En við ákváðum að setja í túristagírinn og keyptum okkur 2 daga passa í sightseeing. Þennan dag var skítakuldi og frekar kalt að sitja á 2. hæð í bussinum svo við drifum okkur út við Empire og ætluðum að kíkja þar upp. Fyrir framan innganginn var ys og þys og fólk virtist vera í röð... já nema við komum vitlausu megin í röðina, hún var víst eitthvað lengri en bara kösin fyrir framn okkur. Jæja, ekkert mál, "við tékkum á þessu... hmmm röðin beygir fyrir hornið á byggingunni" og við byrjum að labba til að komast aftast... og við löbbum og við löbbum og löbbum... hahaha, á þetta að vera fyndið! ENDALAUS röð. Phew! loksins komin aftast. Svo byrjuðum við að bíða á 100. Lengi, lengi, lengi... gekk ekkert á neinum cyber hraða. Mjökuðumst þarna áfram og á eftir okkur í röðinni var fjölskylda frá A-Evr. einhvers staðar og það sem gekk á fyrir þeim!! Ég barðist oft fyrir því að halda jafnvæginu þar sem stelpan var að sanna fyrir stóra bróður að hún gæti sko líka boxað hann... en datt ævinlega beint í bækið á mér!!! hahahaa, voða fyndið... ekki til lengdar í heimsins lengstu röð! Jæja, við komumst loksins inn í andyrið og þar var líka röð.. skrítið!;) Þarna vorum við búin að bíða í 1.5 klukkutíma en vorum amk komin inn og þá hlaut þetta nú að ganga hratt. En nei ó nei! Við tóku fleiri og fáránlegri raðir í löngum og ljótum göngum og rángölum í kjallaranum. Mikið af sikk sakk röðum. Svo loksins poksins komumst við í lyfturnar og fúúúúpp, komin á 80. hæð. En þá voru 6 eftir, önnur lyfta og við blasti dýrðin!!! Það var heiðskýrt og frekar gott skyggni held ég bara og gott ef að þetta var ekki bara 3 klukkutíma biðar virði! :0)

Þessar endalausu raðir voru mér ókunnar þar sem síðast þegar ég fór upp í turninn var þoka og rigning og því ENGAR raðir því hver nennir að fara upp og sjá ekki neitt... í besta falli sá ég glitta í þakið á næsta háhýsi við hliðina! En það sem var fyndið þá var að alla leiðina upp var endurtekið aftur og aftur að skyggnið væri einungis 1/2 míla og var það líklega gert til þess að fækka málsóknum sem kæmu frá skapillum túristum sem sáu ekki neitt frá toppi hæstu byggingar New York.

Daginn eftir kláruðum við sightseeingið, eða amk Lower Manhattan og Mid Town hlutann. Nú, við fengum okkur göngu í Central Park, sáum skautasvellið hans Donalds Trump en nenntum ekki að bíða í röð, enn hvekt frá deginum áður!

Annað sem við gerðum var að labba um í China Town, Little Italy, SoHo og fleiri merkilegum svæðum borgarinnar. Mjög merkilegt að koma inn í þessi hverfi, alltí einu bara komin til "Kína"... ekkert nema kínverjar á götunum, skilti og áletranir á kínversku og útimarkaðir á hverju horni sem selja lifandi kvikindi s.s. krabba, spriklandi rækjur... sá meiraðsegja lifandi ál! væri örugglega fjör að labba með hann heim í plastpoka;)

Við ætluðum að taka ferju út að Frelsisstyttunni en viti menn, eftir um klukkan 2 var lokað fyrir raðir og okkur var sagt að ef við ætluðum að meika það alla leið í röðinni þyrftum við helst að vera mætt á staðinn kl. 08:00. Úffff... þetta er nú ekkert fyndið með þessar raðir! Það er örugglega himnaríki fyrir Svíja að koma til New York.. þeir eru voða mikið fyrir að standa í röð:)

En við sum sé horfðum bara á styttuna úr fjarlægð frá Battery Park og hún var voða fín, það var sól og bjart og fallegt veður :)

Á gamlárskvöld var stefnan auðvitað sett á Time Square og við ákváðum að vera bara frekar snemma í því og lögðum af stað um kl 21. Vorum nú fljót að átta okkur á því að það telst ekki vera tímalega þegar við erum að tala um Gamlárskvöld á Time Square! Fólk hafði beðið þarna allan daginn til að komast á bestu svæðin! Öllum götum í nágrenninu hafði verið lokað fyrir umferð og löggan búin að setja upp stálgirðingar sem mynduðu nokkurs konar bása (stóra) og svo gat löggan labbað um á milli básanna. En það voru sum sé 3 security check á leiðinni og það síðasta var ítarlegast þar sem EINN OG EINN í einu var tekinn fyrir. Allir þurftu að renna frá sér yfirhöfnum og skoðað var í töskur. Svo tóku á móti manni 3 löggumenn og svo var það bara "fætur í sundur og upp með hendur" og málmleitartæki og þukl og káf! Dísös ótrúlegt helvíti... ekkert smá hræddir greyin:) En svo eftir að hafa beðið í "röð" í ca 1.5 tíma gerðum við okkur grein fyrir því að við kæmumst aldrei alla leið. Við vorum stödd á 8. Avenue og milli 39. og 40. strætis, en Time Square er á 42. stræti. Sviðið og aðal skjárinn sneri frá okkur svo við máttum bara giska á hvað þar átti sér stað. Annað slagið var greinilega eitthvað flott eða skemmtilegt að gerast því það mátti heyra fagnaðarlæti í fjarska en svo var það það fyndna að fagnaðarbylgjan og óp og blístur færðist nær og nær og þá fóru allir í kringum mann að taka undir og svona gekk þetta nokkrum sinnum! En við sáum þó kúluna aftan frá og fylgdumst með henni þegar hún var látin síga niður og BÚÚÚMMM! Þá kom mikið fluff og flaff í öllum regnbogans litum (að vísu ekki þar sem við vorum en við sáum það í fjarska;) og nokkrir eymingjlegir flugeldar sprengdir. En svo var þetta líka bara búið og allir að drífa sig út af svæðinu! Löggan stjórnaði þessu allan tíman og það var líka best að gera bara eins og þeir sögðu því það voru ekki nema 25.000 stk. á svæðinu! Ég spurði einn löggumanninn um þetta og sagði honum í leiðinni að þar sem við byggjum (Húsavík) væru kannski svona 5 á vakt á gamlárs... "ha fimm hundruð" sagði manni ringlaður. "nei, einn tveir þrír fjórir FIMM" útskýrði ég fyrir honum og þá srakk hann úr hlátri!

Merkileg reynsla þetta :0)

Í New York setja gulu leigubílarnir mikinn svip á "bæinn" og það væri líka rugggl að vera þarna á einkabíl! Úff, skil ekkert alveg hvernig þessi umferðarmenning virkar þarna. Leigutaxamennirnir eru ekkert að hika við að gefa í þegar þeir sjá heilar 3 auðar bíllengdir fyrir framan sig og keyra oft á milli akreina til að eiga kost á báðum þegar færi gefst að taka fram úr! Einn bílstjórinn sem við húkkuðum keyrði smá utan í annan bíl en það virtist ekki vera neitt stórmál. Enda var ekki sjáanlegur taxi sem ekki var eitthvað lemstraður. En það er ekki hver sem er sem getur fengið gulan bíl og gerst leigubílsstjóri, þú þarft að hafa atvinnuleyfi, náttúrulega, en líka að borga svokallað "medallíugjald" en það er álplata með leyfisnúmerinu á og er þessi plata boltuð gegn um húddið! Þessi "medallía" kostar 40.000 dollara!! Því er það svo að um hvern leigubíl eru oftast 2 eða 3 menn og vinnur bíllinn því allan sólarhringinn fyrir medalíunni. Þannig er nú það;)

En almenningssamgöngur eru mjög góðar og undergroundið þar og með. Reyndar ekkert snyrtilegt við það og svona frekar spooky á köflum. En eftir nokkra daga vorum við orðin helvíti leikin í þessu en einmitt þegar maður verður öruggur með sig gerast misstökin.. hehe! En það var þannig að við vorum eitthvað svona frekar rúggluð í ríminu niðri í göngunum þar sem lestin var mætt og það var kássa af fólki fyrir framan okkur en við ákváðum að skellu okkur með. En það vildi ekki betur til en svo að ég rétt komst inn fyrir dyrnar en líka ekkert lengra en það því þar var stappa af fólki fyrir. Svo þegar ég leit við sá ég Nonna veifa til mín hinum megin við rúðuna og lestin var farin af stað!!! Jeiiiii, voða gaman. En við hittumst svo stuttu seinna á hótelinu eftir smá panikk attakk hjá mér þar sem það var ekki voða langt í að lestin okkar til Washington færi.

En áður en underground-dramað var skoðuðum við nokkur söfn, American Museum of Natural History: ótrúlega stórt og mikið safn en við fórum aðallega þar inn til að sjá Rose Center for Earth and Space sem er þrívíddarbíó sem var geeeðveikt flott. Maddame Tussaud´s vaxmyndasafnið: flott líka. Intrepid Sea-Air-Space Museum sem var um herflugvélar og skip og þannig dót. Fórum inn í Concorde þotu sem þar hefur nýlega verið opnuð fyrir almenning að skoða. Mjög kúl að sjá það! Þar var líka svona orrustuþotu-fluglíkir þar sem 2 og 2 fóru í einu og við skelltum okkur. ALGJÖR SNILLD það en ég mæli ekki með því fyrir flugveika, fólk með innilokunardennd eða veikt hjarta! Þvílíkur hasar, Nonni var með stjórntækin en ég á byssunni!! hehe;) Nonni flaug voða fínt og fallega til að byrja með en mér fannst vanta smá trukk... græjan nebblega snerist alveg á hvolf og í hringi alveg á fullu!! Við prófuðum allar útgáfur... ótrúlegt kikk út úr því:)

Nú, eftir New York tókum við lestina til baka til Washington. Þar gistum við á fínasta Bed&Breakfast (ég reyndar sá aldrei morgunmatinn þar sem hann var alltaf búinn þegar minns fór á fætur.. hihi:). Fyrsta daginn var voða voða fínt veður, sól og líklega yfir 15 stiga hiti!! Við löbbuðum um "Mall-ið" þar sem Lincoln Memorial og Washington spíran og Reflection pond (Forrest Gump og margar fleiri myndir) og allt það er. Fínt og fallegt og allt hrikalega þjóðerniskennt!! En þessa dagana var öllum fánum flaggað í hálfa stöng vegna hamfaranna í Asíu. Um kvöldið fórum við í bíó, Aviator sem er ótrúlega góð og ég mæli með fyrir alla! En, nú kemur sum sé aftur að snýtuklútunum úr flugvélinni því það virðist vera að stelpukjáninn hafi smitað mig af þessu hörku kvefi!! Ég komin með kvef og hósta og hita og leit í það minnsta illa út. Svo við fórum frekar snemma heim. Daginn eftir fórum við og kvefið mitt í útsýnistúr um borgina. Það var alveg mátulega erfitt því ég var alveg þollaus af kvefinu. Washington er með allt annað karakter en New York, t.d. er bannað að byggja hærri byggingar en 15. hæða í Washington. Stoppuðum og skoðuðum dýragarðinn sem var mjög gaman. Sá reyndar ekki nema eina kisu og hún var ekkert einu sinni stór! Held að hinar hafi allar verið einhvers staðar inni að kúra því þær vilja jú hafa hlýtt hjá sér;) En þarna voru gíraffar og fílar og alls kyns apakettir og górillur og einnig pöndur! en alveg eins og pöndurnar sem ég sá í San Diego dýragarðinum voru þessar steinsofandi og höfðu greinilega ekki eins mikinn áhuga á að sjá okkur eins og við þær;) En ég sá svona lítinn apakött eins og mig hefur langað í frá því ég var ca 8 ára! Tókst þó ekki laumað honum í vasann í þetta sinn:)

Um kvöldið römbluðum við inn á körfuboltaleik. Höfðum verið að spá í að skella okkur en vorum eiginlega hætt við því miðinn kostaði 100$ á mann. En þegar við vorum að rölta þarna um fyrir framan leikvanginn voru fullt af gaurum að selja miða á svörtum í gríð og erg! Það endaði með því að við keyptum 2 miða fyrir 100$ og skemmtum okkur konunglega með heimamönnum en lið þeirra, Washington wizards unnu New Jersey Nets í æsispennandi leik:)

Eftir 3 daga í DC fórum við tilbaka til Baltimore og gistum þar síðustu nóttina á sama Bed & Breakfast og ég hafði gist mína fyrstu nótt þegar ég fór til USA fyrir 1.5 ári! Skondið, og fólkið alveg jafn léttklikkað og síðast! Þau taka myndir af öllum gestum og setja í albúm og það fyrsta sem kallinn kom með þegar við stigum inn fyrir þröskuldinn var albúmið með mynd af mér síðan síðast:) Týpískt amerískt kannski... veit ekki en gaman af þessu! En ég mæli hiklaust með þessu gistiheimili ef einhver er að spá í gistingu í Baltimore... fín staðsetning og auðvelt að komast til og frá Flugvelli! Látið mig vita ef þig viljið meiri upplýsingar um það:)

Skoðuðum Downtown Baltimore síðasta daginn í þokusúld, Inner Harbour sem er aðal attraction borgarinnar var ekkert sérlega lífleg en þó gaman að koma þangað aftur. Ég var þarna síðast þegar skútukeppninni lauk sem ég "fékk far í" í okt. 2003. Það voru miklu færri skútur og bátar þarna nú en var síðast enda líka low season í því í janúar!

En jæja, áttum flug um kvöldið sem var styttra en síðast og ég náði að sofa slatta, Nonni ekki neitt sem var slæmt því tímamismunurinn var okkur ekki í hag!!! Lentum kl 7 að morgni á Keflavík og náðum flugi strax norður og þá tók við kærkominn kríublundur í góðasta rúminu heima!! :)

En það var ekki mikill tími til að ná áttum og taka því rólega því 5 dögum seinna flaug ég hingað til Stokkhólms... það var því nánast bara pakkað upp úr töskum, í þvottavélina og aftur oní töskuna;) Gaman að því!

Held ég láti þetta nægja af USA ferðasögu, vona að einhver hafi amk haft sig í gegnum þessa langdregnu langloku;) Held ég fari að leggja mig þar sem klukkan er orðin æði margt!

Heilsist ykkur öllum!

Hej så länge!

P.s. ég er að herða upp hugann til að byrja að grubbla upp myndaalbúm á síðuna. Þá set ég inn myndir frá USA bl.a.

Snjór í Stokkhólmi

2005-01-21T15:03:00.000+01:00

Síðustu 3 dagana hefur verið hvít jörð í höfuðborg Svía, myndi reyndar ekki teljast vera neitt neitt á Íslandi... ekki einu sinni í Reykjavík. En mér finnst þetta bara vera notalegt:)

Í tíma í gær hitti ég 3. kennarann minn, hana Önnu Hallström, alveg óóóskaplega sænsk eldri kona en líka alveg frábær persónuleiki. Hún eyddi tímanum í að kynnast hópnum og lét alla kynna sig og segja örlítið frá sínum högum og hún var sko ekkert feimin við að spyrja... lét allt flakka og grínaðist hægri vinstri! Hún er búin að kenna 27 ár við Stockholm Uni... Vááá frá því ég fæddist hefur Anna Hallström kennt sænsku við SU... hahaha bara fyndið :)
En þar sem ég er með eindæmum vond að muna nöfn á fólki var þetta mjög lærdómsríkur tími fyrir mig! Þjóðernin í hópnum eru nokkuð fleiri en ég hélt í byrjun en fólkið kemur frá:

Eistlandi
Venezuela
Þýskalandi
Finnlandi
Kamerún
Fillipseyjum
Rússlandi
Ástralíu
Kirgistan
Frakklandi
Marokkó
Póllandi
Eþíópíu

Svo gæti verið að einhverjir eigi eftir að bætast við. En það er gaman að þessari blöndu.

Fékk mér bókasafnskort í gær sem gildir á þónokkrum bókasöfnum í borginni, kostar ekki krónu! Fór því á bókasafnið í Kulturhuset sem er menningarhús og er við Sergels torg sem er í hjarta Stokkhólms. Get ég nú fengið bækur, tónlist eða dvd lánað fyrir lítinn pening:) Sniðugt í Svíþjóð!

Hildur systir ætlar að koma og heimsækja mig síðustu helgina í febrúar!! Víííííí :) Það verður örugglega gaman. Þá verð ég kannski búin að læra eitthvað pínu á borgina og get lóðsað hana um;)

Er að hugsa um að fara núna og tékka á því sem þeir kalla Solna Centrum. Það er nebblega þannig að þó að Solna, þar sem ég bý, sé auðvitað í Stokkhólmi, er það sértök kommúna með sitt eigið stjórnunargræ og þannig.

Að lokum:
Til hamingju með bóndadaginn kallarnir!

Hej då!

19. janúar <:o)

2005-01-19T18:50:00.000+01:00

Ja, må hun leva, Ja, må hun leva, Ja må hun leva ut i hundrade år!

Jæja... eitt árið enn komið í sarpinn;) alveg fínast afmælisdagur. Fór í bæinn eftir skóla í dag og keypti þessa fínu afmælistertu og bauð sambýlingum mínum í smá ammliskaffi. Þau komu mér líka á óvart og gáfu mér ammlisgjöf: Handbok i svenska (sem á örugglega eftir að koma sér vel) og gula fallega túlipana:) Krakkarnir heita Andreas, 7 ára og Cecilia, 9 ára. Andreas er enn pínu feiminn við mig en Cecilia spjallar alveg slatta.
Gaman að þessu!

Svo er ég að hugsa um að skella mér bara í bíó í tilefni dagsins!

Ha det så bra!

í skólanum í skólanum...

2005-01-18T21:35:00.000+01:00

Fyrst af öllu..

aðalfréttin.. (reyndar ekki alveg glæglæný)

Hún Berta María vinkona frá Húsavík og kærasti hennar, Raggi rokkari voru að eignast sitt fyrsta barn á aðfaranótt laugard. eða 15. janúar:) Berta var nú búin að lofa að eiga áður en ég færi út svo ég fengi að sjá ungann nýbakaðann... en hann lét bíða eftir sér. Þetta var sum sé strákur, 15 merkur og 53 cm. Ég er búin að sjá mynd af honum og þetta er myndarpiltur!! Þegar ég verð búin að finna út hvernig á að setja inn myndir hér á bloggið fáið þið líka að sjá;)

Til hamingju með prinsinn elsku Berta og Raggi :D

Fór í fyrsta formlega kennslutímann í dag sem var fínn:) Náminu í skipt upp 4 flokka: munnlegt, skriflegt, málfræði og "samfélagsfræði" (social background). Í hverjum bekk (hóp) eru um 20 nemendur og var skipt í þá eftir þjóðernum þar sem reynt var að hafa hópana sem fjölbreyttasta. Í mínum hóp er fólk frá Eistlandi, Venezuela, Þýskalandi, Finnlandi, , Kamerún, Fillipínsku eyjunum, Rússlandi, Ástralíu, Frakklandi og ÍSLANDI (það sko ég;)) svo það er frekar fjölbreyttur hópur. Flestir hafa verið í Svíþjóð í einhver ár og eru giftir svíjum. En ekki allir samt, við hliðina á mér sat finnsk stelpa sem var að koma til Svíþjóðar í fyrsta skiptið fyrir 2 dögum! og samt er Finnland bara rétt fyrir handan hornið!!
En það verður örugglega spennandi að kynnast þessu liði, margir tala miklu betri sænsku en ég svo vonandi get ég lært eitthvað af þeim.

Veðrið var alls ekkert spes í dag, rok og rigning... en ég býst nú ekki við að það fari að snjóa neitt að ráði eins og á Íslandinu. Ég er samt mjög fegin að vera laus við að stikkla á klakaklumpum með lífið í lúkunum! Í staðinn ætla ég að kaupa afmælistertu á morgun og bjóða sambýlingum mínum í kaffi hér heima <:o)

Until later...
over and out!

allt að koma

2005-01-17T02:06:00.000+01:00

jæja ég fann þá á endananum út úr þessu með tenglana... bara að grauta smá í þessu og þá kemur þetta:)

Ég skellti mér í bíó í kvöld, sá Alexander sem hefur fengið frekar lélega dóma hef ég heyrt. En mér fannst þetta alveg ágætis afþreying.

Það er svo sniðugt í Svíþjóð að þú getur fengið gerða ferðaáætlun á netinu þegar þú ætlar að nota almenningssamgöngur. Slærð bara inn hvaðan og hvert þú vilt fara og hvenær þú vilt vera kominn á leiðarenda og þá færðu það svart á hvítu hvaða lest eða bus þú þarft að taka klukkan hvað! Ég voða sniðug og gerði þetta áður en ég fór því lestarnar ganga ekki eins ört á sunnudögum. Ég sá að það væri ansi hæpið að ég næði fyrstu lest heim eftir myndina því ég þurfti fyrst að taka T-bana og skipta svo í Pendeltåg (þetta eru ólík kerfi þar sem T-bana er neðanjarðarlína og Pendeltåg ofan) á central stöðinni. Nú, þegar myndin var búin sá ég að eftir 11 mín. myndi næsta Pendeltåg lest fara en fyrst þurfti ég að ná einni T-bana. Ohhh vonlaust... en ég ákvað þó að prófa, rétt missti af einni T-bana og 3 mín í næsta! OHHH enn vonlausara... en því ekki að prófa. Kom út á Central stöðinni og ekki nema 2 mín þar til Pendeltåget mitt færi! HLAUPA HLAUPA í gegnum göng og sali og að rétta sporinu... upp stigann... neiiii ekki loka dyrunum strax... "dörrana stängs!" í hátalarkerfinu og fjúúúh! Þórunn rétt slapp inn fyrir! ;) sveitt og móð en frekar ánægð með sig að hafa náð þessu og spara 30 mín bið úti í svalri nóttinni! :o) Líkamsrækt dagsin lokið!

Lexía lærð:
Það er í lagi að hlaupa um eins og vitleysingur um ganga neðanjarðalesta Stokkhólms... það gera það margir ;)

God natt

Nýtt "lúkk"

2005-01-16T16:13:00.000+01:00

Er að reyna að læra á þetta blogg-dæmi allt... vildi setja inn tengla en það virðist ekkert vera hægt á hvaða "lúkki" sem er svo ég er komin með nýtt! En ég kann samt ekkert að skrá tenglana inn... hef amk ekki fundið enn hvar á að gera það.

hmm... ábendingar frá færum bloggurum vel þegnar:)

Annars eru bara mikil rólegheit í dag. Þar sem ég þekki engan hér ennþá, var ég bara heima í gærkvköldi og horfði á dvd í tölvunni. Mikael (gaurinn sem ég leigi hjá) fór hins vegar út á djammið... ég hef grun um að hann sé að græja einhverja gellu, amk fór hann út með rauðan rósavönd í hendi og rakspíra skýið á eftir sér... hehe;) En Mikael er fínasti gaur, hann er fráskilinn fyrir rúmlega ári síðan held ég og á tvo krakka, 7 og 9 ára sem eru hjá honum aðra hverja viku. Þau koma á morgun eftir skóla og það verður spennandi að hitta þau, gaman að sjá hvort ég get ekki spjallað við þau og þau kennt mér einhverja sænsku :-)

Ég held ég skelli mér bara kannski í bíó í kvöld! Það er slatti af myndum sem ég alveg til í að sjá og það er alltaf gaman að kíkja í almennilegt bíó:)

Ha det bra!

Oj då!

2005-01-14T22:24:00.000+01:00

var búin að skrifa alveg fullt hér rétt áðan og svo komu þessi margumtölu tæknilegu örðugleikar og eyðilögðu allt!!! pirrandi. Geri einhverjar varúðarráðstafanir næst:)

Reyni nú aftur.

En þar sem ég byrja ekki í skólanum fyrr en á mánudaginn þá tók ég því frekar rólega í dag. Fór eftir hádegið niðrí bæ þar sem var múgur og margmenni. Ég hef komið 3svar áður til Stokkhólms (bæði þegar ég var sem skiptinemi í Kalmar í suður Svíþjóð vorið 2002 og líka þegar við Nonni fórum í brettaferðina til Åre um síðustu páska) fyrir þessa heimsókn mína en það sem mér finnst fyndið núna er að upplifa mig ekki sem ferðamann eins og þá. Mér finnst skondið að sjá túristana stilla sér upp fyrir myndatöku við Sergel's torg í miðborginni og ég ekki einu sinni með myndavél á mér!;) Skemmtileg tilfinning og ég held að þetta borgarlíf eigi eftir að venjast bara fínt!

Það sem ég held að eigi hins vegar ekki eftir að venjast er að sjá heimilislaust fólk betlandi á öðru hverju götuhorni í miðborginni... Mér finnst þetta jafnvel enn meira áberandi hér en í New York (þar sem ég og Nonni vorum um síðustu áramót... skrifa meira um það seinna). Mér finnst alltaf erfitt að þykjast ekki sjá fólkið og ég rétti yfirleitt einhverja smápeninga. En það verður að sýna skynsemi í þessu eins og öðru, annars væru peningarnir fljótir að hverfa.
Sem dæmi get ég nefnt að þegar ég var í lestinni á leiðinni heim í dag kom strákur inn á einni stöðinni, hörundsdökkur, líklega frá Austurlöndum og á að giska 14 ára. Hann lagði litla plastaða miða í sætið við hliðina á hverjum manni í vagninum og þessum miða stóð að hann væri munaðarlaus og atvinnulaus og ætti litla systur sem væri með sykursýki. Hann bað um að honum og systur hans væri rétt hjálparhönd og að fólk gæfi honum pening um leið og hann tæki miðann sinn aftur. Ég rétti honum 20SEK og hann brosti alveg hringinn.
Það er alltaf erfitt að meta hvort fólk sem er að betla sé að segja alveg satt um raunir sínar en ég kýs yfirleitt að trúa því.

Þó að sam-göngur hér séu mjög góðar (lestar bæði ofan jarðar og neðan og strætó sem er örugglega 100 sinnum notendavænni en t.d. í Reykjavík!) kemur það ekki í veg fyrir langar-göngur! Þessa daga sem ég er búin að vera hér hef ég gengið alveg þó nokkurn slatta og blöðrunar sem mér áskotnuðust á litlu tásurnar þegar ég var að þramma um stræti New York eru nú að koma sterkar inn aftur! Það er svona að vera með frekar bæklaðar litlu tásur sem leggjast nær undir næstu tær við hliðina. Gáfulegt að traðka á tásunum á sjálfum sér eða hitt þó!!;) Ég ætla að taka því rólega á morgun og sleikja sárin...

Þegar maður flytur erlendis í þetta stuttan tíma er ekki hægt að taka með sér nema það allra nauðsynlegasta og þær lúxusvörur sem ég er vön að hafa heima hjá mér hef ekki hjá mér núna! Við þessar aðstæður er eins og safnaraeðli mannsins komi upp í mér og ég er nú þegar búin að kaupa alls kyns smáhluti sem ég gæti alveg verið án! t.d. kerti, plagöt og flísteppi. En mér finnst það svo notalegt að hafa svona smádót að ég gat ekki staðist það. Það er heldur ekkert auðvelt að halda veskinu alveg niðri þegar það er ÚTSÖLUR út um allt! Fannst ég t.d. vera helvíti góð þegar ég fann þetta fína rauða jóla-flísteppi á 70% afslætti!!

Svo er líka bara gaman að rölta um og skoða... (já stelpur það þarf ekkert alltaf að kaupa kaupa kaupa!) borgin iðar af fólki og allir eru að fara eitthvað, leita að einhverju eða bara að skoða... eins og ég ;-)

Hej då så länge!

nú er komið að því...

2005-01-13T19:48:00.000+01:00

...að Þórunn byrji að blogga!

Þar sem ég hef nú flutt mig um set og verð hér í Stokkhólmi næstu mánuði datt mér í hug að prófa þetta margumtalaða blogg. Ekki víst að nokkur nenni að lesa það... en það kemur bara í ljós:)

Í gær flaug ég snemma frá KEF til Arlanda. Ég var með ansi mikinn farangur og ákvað því að splæsa í leigutaxa á áfangastað minn sem er í þeim hluta í Stokkhólmi sem heitir Solna. Þar var ég svo heppin að fá herbergi til leigu hjá kalli sem býr einn í nokkuð stórri íbúð ásamt krökkunum sínum tveimur sem eru hjá honum aðra hverju viku. Já, og svo líka hamstrinum ??? sem ég man ekki hvað heitir og hef reyndar ekki séð ennþá því hann er alltaf sofandi!! En herbergið mitt er rosa fínt, hef þar allt sem ég þarf, m.a. háhraða nettengingu og aðgang að sjónvarpi með fullt af stöðvum. Í dag fór ég í háskólann til að skrá mig í kúrsinn sem ég ætla að lesa og heitir hann "Svenska som främmande språk". Þar fékk ég stundaskrá og meiri upplýsingar, svo byrjar allt á fullu á mánudaginn.

Staðsetningin þar sem ég bý virðist vera mjög góð, aðeins 2 mín. labb á næstu lestarstöð (pendeltåg) þar sem ég tek eina lest og skipti á aðalstöðinni og tek aðra lest (tunnelbana) upp í háskóla. Tekur kannski ca 20 min í það heila. Kannski eini gallinn við að vera svona nálægt lestarstöðinni er hávaðinn þegar lestirnar þjóta framhjá!! Eitthvað annað en kyrrðin í Grundargarðinum á gömlu vík;) en þetta venst nú líklega.

Gaurinn sem ég leigi af er mjög almennilegur og það hafa ekki enn orðið mikil samskiptavandamál en ég reyni að tala sæsnku við hann til að æfa mig... ég skipti yfir í ensku ef ég lendi í vandræðum:) Svo á ég eftir að hitta krakkana og það verður örugglega mikið hægt að læra af þeim. Segi meira frá því seinna.

Held ég láti þetta nægja í þetta sinn en reyni að bæta einhverju við fljótlega.

Hej då (,")